Kópshilik Ekonomıka jáne bıýdjettik josparlaý mınıstrliginiń qyzmetine qanaǵattanbaı otyr - Esep komıteti
ASTANA. QazAqparat - Ortalyq memlekettik organdardyń jáne L.Gýmılev atyndaǵy Eýrazııa ulttyq ýnıversıtetiniń júrgizgen saýalnama Ekonomıka jáne bıýdjettik josparlaý mınıstrliginiń qyzmeti jabyq sıpatqa ıe ekenin kórsetip otyr. Bul týraly Respýblıkalyq bıýdjettiń atqarylýyn baqylaý jónindegi esep komıtetiniń baspasóz qyzmetinen habarlandy.
«Saýalnamaǵa qatysqandardyń 58 paıyzdan astamy mınıstrliktiń qyzmetine qanaǵattanbaǵan. Mınıstrliktiń jumys nátıjeleri baıqalmaıdy ne onyń strategııalyq josparlarynyń iske asyrylý barysy jóninde aqparattar joq», - delingen baspasóz baıanynda.
Sonymen qosa, Esep komıteti 2007-2014 jyldary memlekettik josparlaý aqparattyq júıesin damytýǵa 1,6 mlrd. teńge jumsalǵanyn, alaıda atalǵan júıe paıdalanýǵa engizilmegenin alǵa tartady.
«Mınıstrlikte basqa memlekettik organdardyń aqparattyq júıelerimen yqpaldasý jáne derekter almasýy qamtamasyz etilmegen. Ǵylymı qyzmettiń baǵdarlamalyq-nysanaly qarjylandyrý tártibi saqtalmaǵan. Al birqatar ǵylymı-zertteý jumystary belgilengen tártippen akkredıttelmegen vedomstvolyq baǵynysty uıymdar júzege asyrǵan. Zertteýdi júrgizýge arnalǵan ótinimderdi irikteý protsesiniń ashyq emestigi, zertteý nátıjelerin is júzinde qoldaný deńgeıiniń tómendigi baıqalady. Sonymen qatar, saraptama barysynda «Ekonomıkalyq zertteýler ınstıtýty» AQ-nyń eki zertteý jumysynda plagıat faktileri anyqtaldy», - delingen habarlamada.
