Kópshilik bıshilerimizdiń estimeıtinine senbedi - álem chempıonatynda gran-prı alǵan ujym jetekshisi
AQSh-tyń Kalıfornııa shtatyndaǵy Anahaım qalasynda 22-31 shilde aralyǵynda oryndaýshylyq óner túrleriniń 25-shi mereıtoılyq álem chempıonaty ótti. Baıqaýǵa 72 elden 3 myńnan asa konkýrsant qatysty. Elimizdiń namysyn petropavldyq «Sensitive» bal bıi teatrynyń jastary qorǵady. Bıshiler ózderine artylǵan senimdi aqtap, bas júldeni jeńip aldy. Búgin Petropavl temirjol vokzalynda ónerpazdardy olardyń ata-analary men baýyrlary, ustazdary, dostary saltanatpen qarsy aldy.
«Biz osyndaı joǵary deńgeıde uıymdastyrylǵan baıqaýǵa qatysý arqyly zor jaýapkershilikti sezindik, óıtkeni elimizdiń atynan óner kórsettik. Qobaljydyq. Mundaı baıqaýǵa alǵash qatysyp otyrmyz. AQSh-qa, Los-Andjeleske jetken birinshi kúni-aq tirkeý boldy. 72 elden ónerpazdar jınaldy. Komandalar óte kóp boldy, olardyń arasynda bıshiler de, ánshiler de bar. Ýaıymdadyq, kúnine eki ret jattyǵyp otyrdyq», - deıdi ansambldiń kórkemdik jetekshisi Olga Rostavşıkova.
Álem chempıonatynyń formaty boıynsha ár komandaǵa birinshi kezeńde ózin kórsetýge bir mınýt qana berilgen.
«Biz úsh nómir daıyndaǵan edik. Olar: eýropalyq bı - tango, latyn-amerıkalyq bı – sambo jáne óz tarıhymyzda alǵash ret, elimizdiń atynan óner kórsetkennen keıin ulttyq bı daıyndadyq. Eń qıyny, 60 sekýndtyń ishinde qazylar alqasyn baýrap alýymyz kerek boldy. Kelesi kezeńge ótkende qýanyshymyzda shek bolǵan joq. Bir tań qalarlyǵy, basqa eldiń qatysýshylary kelip, bizdi quttyqtap, bizben birge qýanyp jatty. Ol jerdergi kóńil kúıdi aıtyp jetkizýge bolmaıdy, bárimiz bir-birimizge básekeles bolǵanymyzben, myqty qoldaýdy sezindik.
Birinshi kúni 6 adam qazylyq jasasa, ekinshi kúni 12 adam baǵalady. Al, aqtyq oıyndarda tanymal óner juldyzdary – 8 adam qazylyq etti. Bizdiń deńgeıimizdi joǵary baǵalady. Kópshilik bıshilerimizdiń múmkindigi shekteýli, ıaǵnı estimeıtinine senbedi», - deıdi Olga Rostavşıkova.
Aqtyq kezeńge 30 eldiń ónerpazdary ǵana ótti. Jerlesterimiz AQSh, Irlandııa, Frantsııa, Avstralııa, Ońtústik Afrıka Respýblıkasy, Taıland, Kanada jáne Germanııa elderiniń ókilderimen baq synasty.
«Olardyń quramynda 15-20 adamnan óner kórsetti. Biraq, bul joly da sanǵa emes, sapaǵa mán berý kerektigine kózimiz jetti. Jalpy, osy jobaǵa qatysýǵa múmkindik bergen oblys basshylyǵyna alǵys bildiremiz. Bizge qoldaý kórsetken demeýshilerimizge rahmet aıtamyz», - deıdi «Sensitive» bal bıi ujymynyń kórkemdik jetekshisi Olga Rostavşıkova.
