Kópshilik áli kúnge deıin vaktsınaǵa kúmánmen qaraıdy – medıtsına mamany
QYZYLORDA. QazAqparat - Qyzylorda oblysynda koronavırýske qarsy vaktsına saldyrǵan turǵyndar sany ósip keledi. Óńirde 11 myńǵa jýyq adam ekpe saldyrdy, dep habarlaıdy QazAqparat tilshisi.
Solardyń biri - medıtsına salasynyń mamany Saltanat Qalmyrzaeva. Ol oblysta alǵashqylardyń biri bolyp vaktsına saldyrǵan edi.
«Qazir álem elderi koronavırýs indetimen qoldan kelgenshe kúresip jatyr. Juqpaly dert halyqtyń densaýlyǵy men ómirine úlken qaýip tóndirýde. Al bul keseldi jeńýdiń negizgi joly - vaktsına saldyrý. Ókinishke qaraı, kópshilik áli kúnge deıin vaktsınaǵa kúmánmen qaraıdy. Men medıtsına qyzmetkerleriniń ishinde alǵashqylardyń biri bolyp ekpe saldyrdym. Bir emes, eki komponentin de aldym. Bul sheshimdi erikti túrde qabyldadym. Odan keıin densaýlyǵymda eshqandaı keleńsiz jaǵdaılar bolǵan joq.
Aıtaıyn degenim, adam vaktsına jasaý arqyly ujymdyq ımmýnıtet qalyptastyrady. Sonda siz ekpe saldyryp ózińizdi qorǵaý arqyly basqa adamdardyń ál-aýqatyna qamqorlyq jasasyz. Mine, koronavırýs indetin joıýda osy ujymdyq ımmýnıtet negizgi ról atqarady. Sondyqtan árbir adam vaktsına saldyryp, saqtyq sharalaryna kóńil bólý qajet», - dedi qala turǵyny S. Qalmyrzaeva.
Aıta ketıik, Qyzylordada Syrdarııa aýdany «qyzyl» aımaqqa engizildi.
