Kópir qurylysyndaǵy qatelik: Úndistanda jeti ınjener qyzmetinen shettetildi

ASTANA. KAZINFORM — Úndistannyń Madhıa-Pradesh shtatynda quny 200 mıllıon rýpııdi ($2,3 mln) quraıtyn kópir jobasyndaǵy aýyr qatelik úshin jeti ınjener qyzmetinen shettetildi, dep jazdy Kazinform agenttiginiń menshikti tilshisi.

Bhopal qalasynda salynǵan bul kópir 90 gradýsqa kúrt burylatyn qurylymmen erekshelenedi. Bul sheshimge qatysty fotolar úndi áleýmettik jelilerinde keńinen taralyp, halyq arasynda qaýipsizdikke qatysty alańdaýshylyq týǵyzdy. Kópshiligi ınjenerlerdiń mundaı qatelik jibergenine narazylyq bildirdi.

Shtattyń bas mınıstri Mohan ıAdav oqıǵaǵa baılanysty tergeý bastady. Nátıjesinde, jobalaýǵa qatysqan jeti ınjener ýaqytsha qyzmetinen bosatyldy.

Jobanyń bas ınjeneri bul burylysqa tek qana keńistiktiń tarlyǵyna jáne jaqyn mańdaǵy metro stantsııasynyń bolýyna baılanysty barǵanyn aıtqan. Alaıda qazir Bhopal bıligi joldy qaýipsiz etip qaıta jobalaý úshin qosymsha jer telimin satyp alýdy qarastyryp jatyr.

Uzyndyǵy 648 metr bolatyn bul kópir temirjol ótkelderindegi kólik keptelisin azaıtyp, shamamen 300 myń adamǵa qozǵalysty jeńildetýi tıis bolatyn.

Aıta keteıik, buǵan deıin Italııada álemdegi eń úlken aspaly kópir salynatynyn jazǵan edik.