Kóppáterli úılerdiń qasbetteri, shatyrlary jergilikti bıýdjet esebinen jóndeletin bolady

ASTANA. QazAqparat - Turǵyn úı qurylys kooperatıvteri músheleriniń sany salynyp jatqan kóppáterli turǵyn úıdegi páter sanynan aspaýy tıis. Bul týraly búgin QR Úkimetiniń otyrysynda «QR-nyń keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zań jobasyn tanystyrǵan Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.

Onyń aıtýynsha, «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zań jobasy aıasynda birinshiden, jergilikti atqarýshy organdarǵa qalanyń biryńǵaı sáýlettik kelbetin jasaý úshin qasbetterdi, shatyrlardy jergilikti bıýdjet qarajaty esebinen jóndeý qarastyrylady.

«Ekinshiden, sý basý qaýpi bar aımaqtardaǵy turǵyn úılerdiń beriktigin nyǵaıtý kózdelgen. Sebebi zańnamalyq deńgeıde ókilettikterdiń bolmaýyna baılanysty atalǵan jumys túrleri tek tótenshe jaǵdaılar kezinde júrgizilip keledi. Úshinshiden, lıftilerdi jóndeý jáne aýystyrýǵa qatysty shyǵyndardy jergilikti bıýdjet qarajaty esebinen qaıtarymdy negizde múliktiń menshik ıeleri birlestigi qatysýshylarynyń ári qaraı óteýi usynylady. Tórtinshiden kondomınıým obektisiniń ortaq múlki quramyna jer ýchaskesin qosa tirkeý qarastyrylady. Besinshiden, gaz, gazben jabdyqtaý salasyndaǵy baqylaýdy jáne áleýmettik ınfraqurylym obektilerindegi qaýipti tehnıkalyq qurylǵylardy qaýipsiz paıdalanýdy qadaǵalaý júzege asyrylady», - dedi mınıstr.

Sonymen qatar, Jeńis Qasymbektiń aıtýynsha, zań jobasynda turǵyn úı jáne turǵyn úı qurylys kooperatıvteriniń qyzmetin jetildirý qarastyrylǵan. Quqyq qoldaný praktıkasy kórsetkendeı, qurylys kompanııalary «Turǵyn úı qurylysyna úlestik qatysý týraly» zańynyń normalaryn saqtamaı, «úlestik» turǵyn úı-qurylys kooperatıvterin qurý arqyly azamattardyń qarjysyn tartyp keledi.

«Osyǵan baılanysty, zań jobasynda mynalar usynylady: qarjylyq pıramıdalardyń qurylýyn boldyrmaý maqsatynda azamattardyń birigý nysany retinde turǵyn úı kooperatıvterin taratý, bir ǵana kóppáterli turǵynúıdi salý úshin qurylatyn turǵyn úı qurylys kooperatıvterin qaldyrý; turǵyn úı qurylys kooperatıvteri músheleriniń sany salynyp jatqan kóppáterli turǵyn úıdegi páter sanynan aspaýy tıis; turǵyn úı qurylys kooperatıvteri kóppáterli turǵyn úı qurylysyn júrgizýge tek memlekettik tirkeýden keıin jáne memleket jalǵa nemese menshik quqyǵyna bergen qurylys salýǵa arnalǵan jer ýchaskesi bolǵanda ǵana quqyly», - dedi ol.