Kóppáterli turǵyn úıdi basqarý: Eki myńǵa jýyq jańa uıym quryldy

NUR-SULTAN. QazAqparat – Qazaqstanda kóppáterli turǵyn úıdi basqarýdyń jańa formasyna kóshý jumystary júrip jatyr. Bul týraly QR Indýstrııa jáne ınfraqurylymdyq damý mınıstrligi qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Erkebulan Daýylbaev aıtyp berdi.

«2020 jyldyń basynan bastap «Keıbir zańnamalyq aktilerge turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» QR Zańy kúshine engen bolatyn. Memleket basshysynyń 2020 jyly 1 qyrkúıektegi «Qazaqstan Jańa naqty ahýalda: is-qımyl ýaqyty» Joldaýy aıasynda Úkimetke jáne ákimderge múlik ıeleri birlestikteri ınstıtýtyn engizý jónindegi reformany iske asyrýdy qamtamasyz etý tapsyryldy», - dedi E. Daýylbaev Ortalyq kommýnıkatsııalar qyzmetinde ótken baspasóz máslıhatynda.

Reforma «bir úı – bir birlestik – bir esepshot» prıntsıpi boıynsha «múlik ıeleriniń birlestigi» kommertsııalyq emes uıymynyń jańa formasyn qurý jolymen basqarý organdarynyń qyzmetin retteýge baǵyttalǵan.

«Zańdy iske asyrýǵa qajetti normatıvtik quqyqtyq aktiler ázirlendi. Reformany júıeli iske asyrý úshin jergilikti atqarýshy organdarda kóppáterli turǵyn úıdi basqarýdyń jańa formalaryna ótý boıynsha Jol kartalary ázirlenip, mınıstrliktiń baqylaýynda tur. QR Ádilet mınıstrliginiń derekterine sáıkes, bıylǵy 22 aqpandaǵy jaǵdaı boıynsha 1 735 jańa basqarý formasy qurylǵan (Múlik ıeleri birlestigi - 695, Jaı seriktestikter – 1 040). Olardyń basym bóligi Nur-Sultan jáne Almaty qalalarynda. Basqarýdyń jańa nysandaryn qurý paıyzynyń tómendigi jınalys ótkizýdi shekteıtin karantın sharalarymen baılanysty ekeni sózsiz», - deıdi spıker.

Onyń aıtýynsha, turǵyn úı qatynastary salasyndaǵy qarqyndy ózgeristerge kóppáterli turǵyn úılerdi basqarý salasyndaǵy azamattardyń shaǵymdary túrtki bolǵan.

«Ásirese bul qyzmetterinde sheshim qabyldaý jáne qarajatty jumsaý jaǵynan ashyqtyqtyǵy joq «kópúıli» páter ıeleriniń kooperatıvterine (PIK), páter ıeleriniń tutyný kooperatıvterine qatysty boldy. Sondyqtan páterlerdiń, turǵyn emes úı-jaılar ıeleriniń qarajattyń túsýi men jumsalýynyń ashyqtyǵyn qamtamasyz etý úshin óz úıinde múlik ıeleri birlestigin nemese jaı seriktestik qurý qajettigin túsinýi mańyzdy», - deıdi E. Daýylbaev.

Bul rette basqarýdyń eski nysandary 2022 jyldyń 1 shildesine deıin óz qyzmetin jalǵastyrady. Osy merzim aıaqtalǵan soń Qazaqstan Respýblıkasynyń zańnamasynda belgilengen tártippen joıý rásimin júrgizýi tıis.