Kóppáterli turǵyn úılerdi basqarý salasynda qandaı ózgerister bolady
ASTANA. KAZINFORM – Múlik ıeleri birlestigi tóraǵalarynyń quzyretine qatysty birqatar dál emes ári ekiushty uǵymdar anyqtaldy. Bul týraly Quryltaı depýtattarynyń saýalyna Ónerkásip jáne qurylys vıtse-mınıstri Rahymjan Isaqulovtyń jaýabynda aıtylǵan.
- «Turǵyn úı qatynastary týraly» Zańda turǵyn úı qoryn basqarý salasyndaǵy quqyqtyq qatynastardy retteý, onyń ishinde zańǵa táýeldi normatıvtik-quqyqtyq aktilerdi qabyldaý boıynsha memlekettik organdardyń birqatar quzyreti kózdelgen. Búginde mınıstrlik barlyq buıryqty qoldanystaǵy zańnamaǵa sáıkestendirip, monıtorıng júrgizý boıynsha qajetti sharalardy qabyldady. Sonymen qatar, jergilikti atqarýshy organdardyń birqatar ókilettiginde sáıkessizdikter anyqtaldy. Olardy iske asyrý qoldanystaǵy Zańǵa ózgerister engizý qajettiligine baılanysty múmkin bolmaı otyr,- dedi Rahymjan Isaqulov.
Onyń aıtýynsha, tekserý paraǵyna 17 tarmaq qosymsha engizildi. Onda kondomınıým obektisin basqarý nysany nemese kondomınıým obektisin basqarý sýbektisi ózgergen kezde ne kondomınıým obektisin basqarý jónindegi qyzmet toqtatylǵan jaǵdaıda tapsyrys berýshiniń (qurylys salýshynyń), múlik ıeleri birlestiginiń tóraǵasynyń ne kondomınıým obektisin basqarý sýbektileriniń qujattamany, sondaı-aq ózge de tehnıkalyq quraldar men jabdyqtardy qabyldaý-tapsyrý aktisi boıynsha ýaqtyly jáne tolyq kólemde berýin tekserý kózdelgen.
- Degenmen, Zańnyń 10-9-babynyń 2-tarmaǵyna sáıkes, memlekettik baqylaý men qadaǵalaý sýbektileri retinde tek múlik ıeleriniń birlestigi jáne kondomınıým obektisin basqarý sýbektileri ǵana aıqyndalǵan. Qurylys salýshylar memlekettik baqylaý sýbektilerine jatpaıdy. Osyǵan baılanysty is júzinde olarǵa qatysty ákimshilik sanktsııalardy qoldaný múmkin emes. Budan bólek, mınıstrlik jeke jáne zańdy tulǵalardan kelip túsken ótinishter aıasynda zańnamaǵa monıtorıng júrgizdi. Onyń nátıjeleri boıynsha múlik ıeleri birlestigi tóraǵalarynyń quzyretine qatysty birqatar dál emes ári ekiushty uǵymdar anyqtaldy.
Atalǵan quzyretterdi naqtylaý úshin Zańǵa túzetýler engizý qajet, - dedi ol.
Vıtse-mınıstrdiń atap ótýinshe, mınıstrlik osy saladaǵy qoldanystaǵy zańnama men zańǵa táýeldi aktilerdi odan ári jetildirý boıynsha jumysty turaqty negizde júrgizip keledi. Zańnamalyq retteýdi talap etetin anyqtalǵan máseleler boıynsha «Turǵyn úı qatynastary týraly» Zańǵa ózgerister engizý jóninde tıisti usynystar ázirleý jumysy jalǵastyrylady.
- Joǵaryda baıandalǵandardy eskere otyryp, júrgizilgen qaıta qaraý qorytyndysy boıynsha Mınıstrlik óz quzyreti sheginde barlyq qajetti sharalardy qabyldady. Al memlekettik baqylaý men qadaǵalaý sýbektileriniń quramyn keńeıtý (qurylys salýshylar bóliginde), sondaı-aq uǵymdyq apparat pen múlik ıeleri birlestigi tóraǵalarynyń quzyretterin naqtylaý máseleleri qoldanystaǵy zańnamany jetildirý aıasynda pysyqtalady, - dedi ol.
Buǵan deıin jyljymaıtyn múlik úlesine ınvestıtsııa salý múmkindigi iske qosylatynyn jazǵan edik.
