Kópqabatty úılerde otbasylyq ambýlatorııalar bolýy kerek - Ǵabıdolla Ábdirahymov
Shahar basshysy qalalyq Densaýlyq saqtaý basqarmasynyń basshysy Nurlan Qasymovqa otbasylyq ambýlatorııalardy uıymdastyrý máselesin qaraýdy tapsyrdy.
«Jańa kópqabatty úılerdiń birinshi qabattarynda otbasylyq ambýlatorııalar bolýy kerek. Mundaı tájirıbe Eýropa elderinde bar. Bul óte yńǵaıly: balanyń tamaǵy aýyryp qaldy, birinshi qabatqa tústi. Al aýrýhanalar men emhanalarǵa aýyr sebeptermen barý kerek. Sonda ol jaqta da kezek kútpeıtin bolady»,-dedi Ǵabıdolla Ábdirahymov.
Jıynda basqarma basshysy 2019 jyly barlyq qalalyq medıtsınalyq mekemeler sandyq formatqa kóshiriletinin atap ótti. Onyń sózinshe, bir ýchaskelik dárigerdiń halyqty qamtý deńgeıin 2080 adamnan 1700 jylǵa deıin qysqartý josparlanyp otyr.
Jıynda sondaı-aq qala ákimi apparatynyń basshysy Erkeǵalı Álimqulov sóz sóılep, elektrondy formatta qyzmet kórsetý qajettiligi týraly aıtty. Bul rette qala ákimi qaramaǵyndaǵylarǵa sandyq protsesti jedeldetýdi jáne osy baǵytta jaqynda qurylǵan «Shymkent» ÁKK-men tyǵyz qarym-qatynas jasaýdy tapsyrdy.
Basqosýda budan bólek Jolaýshylar kóligi jáne avtomobıl joldary basqarmasynyń basshysy Qýatjan Jumataev aldaǵy ýaqytta júzege asyratyn aýqymdy jobalaryn tanystyrdy. Jospar boıynsha kelesi jyly qala ortalyǵyndaǵy Qonaev dańǵylynyń qurylysy men A-2 aınalma jolyn qaıta jańartý jumystary bastalady. 20 mıllıardtan astam teńgege 350 kósheni jóndeýge jobalyq-smetalyq qujattama daıyndalyp qoıǵan. Kezdesý barysynda barlyq basqarma basshylaryna birqatar tapsyrmalar berildi. Sondaı-aq, «7-20-25» jańa turǵyn úı baǵdarlamasyn keńinen nasıhattaý tapsyryldy.
Jıyndy qorytyndylaǵan Ǵabıdolla Ábdirahymov Elbasynyń Joldaýyndaǵy memlekettik organdarǵa formalızm men bıýrokratııany azaıtý týraly tarmaǵyn erekshe atap ótti.
«Jınalysty azaıtyp, atqaratyn jumysty kóbeıtý kerek! Máselelerdi telefon arqyly sheshińizder. Bul qandaı da bir dárejede sybaılas jemqorlyqty boldyrmaıdy: eger ol memlekettik qyzmetshimen tikeleı kezdesýge kelse bir nárse jasyrady nemese bir nárse usynǵysy keledi»,- dedi qala basshysy.