Kópqabatty úıdiń súrilýi: Elorda ákimdigi túsinikteme berdi
NUR-SULTAN. QazAqparat – Nur-Sultan qalasynyń ákimdigi qurylysy aıaqtalmaǵan «Terrıtorııa komforta-1» turǵyn úı keshenin súrý jóninde túsinikteme berdi, dep habarlaıdy QazAqparat.
«Tótenshe jaǵdaılar departamentiniń tehnıkalyq tekserýi men tujyrymdamasynan keıin «Terrıtorııa komforta-1» turǵyn úı kesheni súrilip jatyr. Bul jumystar qol kompressorlary arqyly temir-beton taqtalardy buzý ádisimen bastaldy. Alaıda, bul jumystardy atqarýda nysan qabyrǵasynda jaryqshaqtar paıda boldy. Qıraýdyń aldyn alyp, qaýipsizdikti qamtamasyz etý maqsatynda ǵımaratty aýlaǵa qaraı baǵyttap súrý sheshimi qabyldandy», - dep jazdy elorda ákimdigi baspasóz qyzmetiniń basshysy Aqmaral Oljabaeva Facebook-tegi resmı paraqshasynda.
Onyń aıtýynsha, 24 qazanda turǵyn úı kesheniniń alǵashqy ǵımaraty buzyldy.
Aıta keteıik, áleýmettik jelide kórshiles ornalasqan úı turǵyndary súrý jumystarynyń túnde júrgizilgenine narazylyq bildirdi.
Úleskerlerdiń qatysýymen qurylysy 10 jyl buryn bastalǵan problemaly úıdiń súriletini bıylǵy tamyz aıynda habarlanǵan bolatyn.
