Kópqabatty úıdegi órt: Adamdardy aman alyp shyqqan aqtóbelikter marapattaldy
Aqtóbe qalasynyń ákimdigi búgin órt kezinde turǵyndardy syrtqa alyp shyqqan eriktiler men polıtsııa, tótenshe jaǵdaılar qyzmetkerlerin marapattady. Olardyń qatarynda Aqtóbe polıtehnıkalyq kolledjiniń eki stýdenti bar. 18 jastaǵy Aleksandr Tımoshenko men 19 jastaǵy Vladımır Kalmykov órt sóndirýshiler kelgenshe adamdardy syrtqa shyǵardy.
«Bizde oılanyp turatyn ýaqyt bolǵan joq. Podezdge kirip, ár páterdiń esigin qaqtyq. Ata-analar balalaryn qolyna ustap, júgirdi. Al qarııalardy demep, qolynan ustadyq. Tútin myqty boldy, aıaq asty kórinbedi. Keıin ústimizdegi kıimdi sheship, sýlap, basymyzǵa kıip kirýge týra keldi. Al órt sóndirýshiler kelgende kásibı mamandarǵa tapsyrýymyzdy surady»,- dedi Aleksandr Tımoshenko. Ákimdik eki stýdentke alǵys hat pen 100 myń teńgeniń sertıfıkatyn usyndy.
Demalysta júrgen órt sóndirýshiler de óz mindetin buljytpaı oryndady.
«Ózim sol úıdiń mańynda qonaqta otyrdym. Úıden shyqqan kezde aýla ishindegi tútindi kórdik. Júgirip baryp, adamdardy shyǵara bastadyq. Ol kezde órt sóndirý qyzmeti kelmedi. Tehnıka jetken kezde olarǵa baǵyt berip, jol siltedik. Ári qaraı áriptesterimiz óz jumysyn atqardy»,- dedi órt sóndirý qyzmeti bóliminiń aǵa ınjeneri Ádil Mýftakov. Sonymen qatar onyń janynda órt sóndirýshi Qýantaı Baımýrzın bolǵan. Búgin ákimdikte órt sóndirýshiler Nurbolat Súıeýov, Qanat Jáýtikov, Erkin Otarbaev ta marapattaldy. Jergilikti polıtsııa qyzmetkerleri qatarynda Almat Sarın, Medet Qoıtanov, ýchaskelik ınspektor Arman Kýshnııazov bar.
«Ábilqaıyr han dańǵylyndaǵy kópqabatty úıde 69-páter jandy. Jalyn kópqabatty úıdiń balkondaryna aýysty. Órt kezinde 30 páter zaqymdaldy. Al bireýi tolyǵymen janyp ketti. Barlyǵy 47 adam qutqarylyp, 200 adam qaýipsiz jerge shyǵaryldy. Qaıǵyly oqıǵa tirkelmedi. Órttiń jalpy aýmaǵy 200 sh.m.qurap otyr. ІІB-nyń Sazdy polıtsııa bólimi tergeýdi bastady»,- dedi qalalyq TJB bastyǵy Aıbat Jańabergenov.
Turǵyn úı-kommýnaldyq sharýashylyq mekemesi túni boıy jumys istep, qara kúıe bolǵan úıdiń qasbetin syrlap qoıdy. Páteri órtke oranyp, zaqymdanǵan turǵyndardyń eshqaısysy ákimdikten jatyn oryn surap kelmegen.
Eske sala keteıik, keshe Aqtóbedegi 9 qabatty úı órtenip, 200 adam qaýipsiz jerge kóshirilgen bolatyn. Sondaı-aq, oqıǵaǵa baılanysty arnaıy komıssııa quryldy.
