Kópqabatty úı turǵyndarynyń Almaty metrosyna shaǵymy: Tekseris aıaqtaldy
ALMATY. QazAqparat - Almatyda Gogol kóshesindegi kópqabatty úıdiń turǵyndary vıbratsııadan baspanalary qırap jatqanyna shaǵymdandy. Olardyń paıymynsha, buǵan sebep - metronyń jaqyn ornalasýy. Búgin qalalyq «Metropolıten» MKK bul shaǵymǵa qatysty tekseris nátıjesin jarııalady, dep habarlaıdy QazAqparat tilshisi.
Mamandar jerasty shýy men terbelistiń atalǵan úıdiń konstrýktsııasyna qanshalyqty áser etip jatqanyn tekserdi. Onyń barysynda turǵyndardyń kórsetken aqaýlary úıdiń shyǵys jaǵynda ornalasqany anyqtaldy. Bul, metropolıtenniń tehnıkalyq zonasynan tys ornalasqan.
Sonymen qatar, metro syzyǵynda ornalasqan ǵımarattardyń kórsetkishi tekserildi.
«Bul ólshemder 1993 jyldan beri marksheıderlik qujattar reestrinde tirkeýli. Osy ýaqytqa deıin aýytqý tirkelmedi. Turǵyndardyń shaǵymyna kelsek, bul úıde shý men dirildiń kórsetkishi de qalypty», - dedi «Metropolıten» MKK baspasóz qyzmetinen.
