Kópqabatty turǵyn úılerdiń kútimine kim jaýap beredi
ASTANA. QazAqparat - Astana qalasynyń ákimi Áset Isekeshev óziniń Feısbýk paraqshasynda kópqabatty turǵyn úılerdiń kútimine kim jaýapty ekenin túsindiretin vıdeony jarııa etti, dep habarlaıdy QazAqparat.
«Biz sizdermen úı ıesi bola otyryp, shatyrdaǵy aqaýlar, podezdiń jóndeýi, ystyq sýdyń óshirilýi sekildi máselelerge tap bolyp jatamyz. Jertóle týraly tipti aıtpaı-aq qoıalyq. Qanekeı, bizdiń jaýapkershilik qandaı jáne kommýnaldyq qyzmetterdiń mindeti qaı jerden bastalatynyn anyqtap kórelik. Sonymen bárin tártip boıynsha baıandasaq», - delingen vıdeoda turǵyn úı - ár adamnyń jeke ıeligi ekendigi eskertiledi.
Beınerolıkte berilgenindeı, ár adam - óz úıiniń qojasy. ıAǵnı, ol úıdegi qubyr men elektr jelisiniń, elektr qurylǵylarynyń jaıyna ár adamnyń ózi jaýapty.
«Jeke múlikten bólek, sizde jeke úleskerlik múlik baryn umytpańyz. Naqtyraq aıtqanda, siz óz podezińizdegi kórshilerińizben birge, turǵyn úıdiń baspaldaǵyna, podezine, qoqys qubyryna, podezine tereze ornatýǵa, esikterge jaýaptysyz. Al jalpy úılerdiń elektr jelileri elektrlik qyzmet kórsetetin uıymnyń moınynda. Biraq, bunymen sizdiń múlkińiz shektelip qalmaıdy. Kórshilerińizben birge, úı turǵan jer ýchastogyna, qoqys kameralaryna, shatyrǵa, jertólege jaýap beresiz. Bunyń bári de ortaq - turǵyndardyń úleskerlik ıeligi. Osylaısha sizdiń ıeligińiz - ıaǵnı jaýapkershiligińiz aıaqtalady. Bunyń bári de kondomınıým nysany dep atalady», - deıdi.
Odan keıin elektr qýatyn jetkizip berip turǵan, káriz sýyna, jylý energtııasyna, ystyq jáne sýyq sýǵa jaýapty kommýnaldyq qyzmetterdiń jaýapkershiligi bastalady.
«Mine, osylaısha qysqasha ǵana mysalmen biz sizderge kommýnaldyq qyzmetterdi jetkizip berýshiler men tutynýshylar arasyndaǵy qarym-qatynastyń kúrdeli júıesin aıqyndap berdik. Ózara qarym-qatynastyń formýlasyn usynamyz: kondomınıým nysany turǵyn úıdiń jeke ıeligi men páter ıesiniń jalpy úleskerlik ıeliginiń qosyndysyna teń. Baıqasańyz, bári de aıtarlyqtaı kúrdeli emes. Kóptegen máseleler ózimizge baılanysty. Biz sizdermen birge tek páterdiń ǵana emes, podezdiń de, jertóleniń de, shatyrdyń, úı mańyndaǵy jer ýchaskesine ıesimiz. Ómir súrýimizdiń jaılylyǵy bárimizge baılanysty. Tek ózimizdiń múlkimizge jiti qarasaq bolǵany», - dep aıaqtalǵan beınerolık.
Aıta keteıik, eki jarym mınýttyq beınerolık áleýmettik jelide taratýǵa yńǵaıly ázirlengen.
