Kópes monshasy psıhıatrııalyq dıspanserge aınaldy — Petropavldaǵy ǵımarattyń tarıhy
PETROPAVL. KAZINFORM — Petropavldyń Rıjskaıa kóshesindegi psıhıkalyq densaýlyq ortalyǵy bir kezderi kópestiń tapsyrysymen salynǵan monsha bolǵan. Kazinform agenttiginiń tilshisi ǵımarattyń tarıhy týraly baıandap beredi.
Qaladaǵy saýda ǵımarattary arasynda salystyrmaly túrde jas ǵımarat 1912 jyly kópes Nazarovtyń buıryǵymen salynǵan. Ol monsha retinde boı kóterdi. Al 1917 jyldan keıin kóptegen saýda oryndary sııaqty ókimet menshigine ótti. Alaıda, kópesterge tıesili ǵımarattardyń kópshiligine qaraǵanda maqsaty saqtalyp qaldy.
1950-shi jyldarǵa deıin Rıjskaıa kóshesi, 6 mekenjaıyndaǵy ǵımarat qalalyq qoǵamdyq monsha boldy.
«Kirpishten salynǵan eki qabatty ǵımarat. Negizgi vestıbıýldiń ústine úshinshi qabatty shaǵyndap turǵyzǵan. Keıinnen qosylǵan ǵımarattyń shyǵys qanatynyń sońǵy qasbeti Rıjskaıa kóshesine qaraıdy. Qalanyń taý baýraıyndaǵy bóligine qaraǵan batys qasbeti qatty qyzyqtyrady.
Vestıbıýl ıntererinde qoǵamdyq ǵımarattarǵa tán sándik ashyq qorshaýlary bar keń baspaldaq tur. Ǵımarat — HH ǵasyrdyń basyna tán provıntsııalyq kópes qalasynyń tarıhı maketiniń úlgisi. Qoǵamdyq-turmystyq maqsattaǵy kirpish ǵımarattar josparly keshendi damytýda kórinis taýyp, qalanyń sáýlet murasy boldy», — delingen arhıv qujattarynda.
Petropavldaǵy kópes Nazarov qaladaǵy alǵashqy kınoteatr ǵımaratyna da ıelik etken.
Bir ǵajaby, ǵasyrlyq tarıhy bar bul nysan áli kúnge deıin óziniń maqsatyn saqtap qaldy. Birneshe jyl buryn oǵan «Jańa álem» degen bastapqy ataýy qaıtaryldy.
1910 jylǵy mekenjaı jáne anyqtamalyq saýda-ónerkásip kitapshasyndaǵy málimetter boıynsha kópes V.A.Nazarov qalada jıhazdalǵan bólmelerge de ıe boldy.
Rıjskaıa kóshesi, 6 mekenjaıyndaǵy ǵımarattardyń tarıhyna oralsaq, ol 1961 jyldan bastap 200 tósek-orny bar oblystyq psıhıatrııalyq aýrýhananyń bas ǵımaratyna aınaldy.
Qazirgi kezde munda birneshe korpýstan turatyn psıhıkalyq densaýlyq ortalyǵy bar. Solardyń biri — eki qabatty kirpishten salynǵan, tas portaly bar, sándik elementteri joq ǵımarat ta kópes ǵımaraty boldy. Ony HІH ǵasyrdyń ekinshi jartysynda kópes Kazantsev salyp, ony meıramhana qylǵan.
Memleket menshigine alynǵannan keıin ǵımarat medıtsınalyq mekemelerge berildi.
Petropavldaǵy birinshi gıldııa kópesi Grıgorıı Kazantsev metsenat retinde de tanymal bolǵan. Qalada Kazantsevterdiń úıi de saqtalǵan. Fantast jazýshy Aleksandr Kazantsev balalyq shaǵyn osy jerde ótkizdi.