Kopengagende Eýropanyń túkpir-túkpirinen «Qaırattyń» jankúıerleri jınalyp jatyr
ALMATY. KAZINFORM — Danııa astanasy Kopengagende Eýropanyń ár elinde turatyn almatylyq «Qaırat» klýbynyń jankúıerleri match aldynda bas qosyp jatyr.
Komandany qoldaýǵa barǵandardyń biri — Kopengagennen 192 shaqyrym qashyqtyqtaǵy Orhýs qalasynda turatyn Akbar Aıýbı.
Ol tańerteń erte jolǵa shyǵyp, Danııa astanasyna jetken. Sodan keıin Frantsııadan arnaıy osy oıyn úshin ushyp kelgen dostaryn áýejaıdan ózi qarsy alǵan.
— Qazir bárimiz stadıon mańyndaǵy bir dámhanada bas qosyp, áńgime-dúken quryp otyrmyz. Keıbirimiz endi tanysyp jatyrmyz. Kóńil-kúı keremet, biz matchqa tolyq daıynbyz, — dedi ol Kazinform tilshisine.
Olardyń qolynda «Qaırattyń» jalaýy men moıynoraǵyshtary da bar.
Jankúıerler keshki oıyn bastalar aldynda «Parken» stadıonyna jaıaý barýdy josparlap otyr.
Olardyń sózinshe, bul — klýbqa qoldaý bildirýdiń, birlikti kórsetýdiń eń jaqsy joly.
Aıta keteıik, «Qaırat» Chempıondar lıgasynyń jalpy kezeńiniń besinshi týry aıasynda «Kopengagen» komandasymen kezdesedi.
Match búgin, 26 qarashada Danııa astanasyndaǵy «Parken» stadıonynda ótedi. Oıyn Qazaqstan ýaqyty boıynsha 22:45–te bastalady.
«Qaırat» fýtbolshylary 25 qarashada Kopengagende alǵashqy jattyǵýyn ótkizdi.
Tórt týrdan keıin «Kopengagen» men «Qaırattyń» árqaısysynda bir-bir upaıdan bar jáne olar jalpy kezeń kestesinde 33 jáne 34-oryndardy tur. Dat klýby tek soǵylǵan jáne jiberilgen goldar aıyrmasy boıynsha joǵary tur.
Eske salaıyq, buǵan deıin Kopengagendegi Danııa Koroldigi teatrynda óner kórsetip júrgen qazaq bıshisi Meırambek Nazarǵojaev áýeli trıbýnada «Qaıratqa» jankúıer bolyp, jarty saǵattan keıin sahnada áıgili «Şelkýnchık» spektaklinde Hanzadanyń partııasyn bıleıtinin jazǵanbyz.
Ol Kazinform tilshisine eki birdeı mańyzdy oqıǵaǵa daıyndyǵy týraly aıtyp bergen edi.