Kopengagende BUU konferentsııasy óz jumysyn aıaqtady
ASTANA. Jeltoqsannyń 20-sy. QazAqparat - Senbi, jeltoqsannyń 19-y kúni eki aptaǵa sozylǵan jaryssózden keıin BUU-nyń Klımattyń ózgerýi jónindegi 15-shi negizgi konferentsııasy óz jumysyn aıaqtady,
dep habarlaıdy ITAR-TASS agenttigi.
Tarıhtaǵy eń alqaly halyqaralyq klımattyq forýmǵa BUU-ǵa múshe 193 eldiń ókilderi qatysty. Forýmdy qorytyndylaýy tıis AQSh, Qytaı, Úndistan, Ońtústik Afrıka Respýblıkasy jáne Brazılııa elderiniń basshylary ázirlegen «Kopengagen kelisimi» maquldanǵan joq, degenmen, konferentsııaǵa qatysýshylar ol qujatty nazarlaryna aldy.
Bul qujatta 2010-2012 jyldary damýshy elderge 30 mıllıard dollar kóleminde «jedel kómek» berý, sondaı-aq 2020 jylǵa deıin jyl saıyn taǵy 100 mıllıard dollardan berý máseleleri qarastyrylady, biraq zııandy gaz qaldyqtarynyń shyǵarylýyn qysqartý salasynda eshqandaı naqty mindetter qoıylmaıdy.
Al forýmnyń sońynda sóz sóılegen ońtústikafrıkalyq delegat, jarty jyldan keıin Bonn qalasynda ótetin jańa klımattyq konferentsııanyń Ońtústik Afrıka Respýblıkasynda maýsymnyń 11-i men shildeniń 11-i aralyǵynda ótetin fýtboldan Álem chempıonatymen qatar kelip qalmaýyn ótindi.
