Kopengagen men Oslo áýejaılarynda drondar saldarynan ondaǵan reıs keıinge shegerildi

ASTANA. KAZINFORM – Kopengagen men Oslo áýejaılarynda reıster kestesinde irkilister oryn aldy, dep habarlaıdy VVS.

Danııa astanasyndaǵy Skandınavııanyń eń iri áýejaıy «Kastrýpta» dúısenbi kúni keshke aerodrom mańynda belgisiz drondar baıqalǵannan keıin áýe keńistigi jabyldy.

Kopengagen polıtsııasynyń dereginshe, onda eki-úsh iri dronnyń ushýy tirkelgen.

– Eshbir áýe kemesi ushyp kete de, qona da almaıdy, – dedi áýejaıdyń baspasóz hatshysy Lız Agerlı Kýrshteın.

Onyń aıtýynsha, shamamen 15 reıs ózge áýejaılarǵa baǵyttaldy.

Qala polıtsııasynyń kezekshi ofıtseri Annette Ostenfeldt oqıǵanyń mán-jaıyn anyqtaý úshin tergeý júrgizilip jatqanyn aıtty. Onyń sózinshe, drondar jeke tulǵalarǵa qoljetimdi ádettegi úlgilerden áldeqaıda iri bolǵan.

Túngi saǵat 00:30 kezinde, shamamen tórt saǵattan keıin, reıster qaıta jalǵasty. Flightradar24 derekterine sáıkes, áýe keńistigi jabyq bolǵan kezeńde barlyǵy 50 reıs qosymsha áýejaılarǵa jiberildi.

– Kopengagen áýejaıy drondar saldarynan jabylǵannan keıin jumysyn qaıta bastady. Degenmen reısterde keshigýler men toqtatýlar bolýy múmkin. Jolaýshylarǵa avıakompanııalardan keletin aqparatty baqylap otyrý usynylady, – delingen áýejaıdyń X-tegi habarlamasynda.

Norvegııa astanasynyń «Gardermýen» áýejaıy da belgisiz dronnyń ushýyna baılanysty ýaqytsha jabyldy.

Jergilikti BAQ málimetinshe, 12-14 reıs basqa baǵytqa jóneltildi. Olardyń arasynda Antalıa, Malaga jáne Manchesterden ushyp kelgen ushaqtar bar. Flightradar24 aqparaty boıynsha, olardyń birazy Bergen áýejaıyna qondyrylǵan.

Aeroporttyń kommýnıkatsııalar bóliminiń jetekshisi Monıka Fastıng VG basylymyna 03:38-de bergen málimdemesinde, áýe keńistiginiń qaıta ashylǵanyn jáne seısenbi tańynan bastap reıster qalypty rejımde júzege asatynyn habarlady.

Danııa polıtsııasy oqıǵanyń eki elde bir mezgilde tirkelýine baılanysty norvegııalyq áriptesterimen birlesip, olardyń arasyndaǵy baılanysty anyqtaýǵa kiristi.

Aıta keteıik, AQSh-tyń áskerı qyzmetkerleri tikushaq apatynan qaza tapty.