Kopengagen álemdegi ómir súrýge eń qolaıly qala atandy
ASTANA. KAZINFORM – Kopengagen ekinshi jyl qatarynan álemdegi ómir súrýge eń qolaıly qala dep tanyldy. Bul týraly Economist Intelligence Unit (EIU) jarııalaǵan Global Liveability Index 2026 reıtınginde aıtyldy.
Danııa astanasy múmkin bolǵan 100 baldyń 98-in jınap, reıtıngtegi birinshi ornyn saqtap qaldy.
Ekinshi orynǵa Vena, úshinshi orynǵa Melbýrn jaıǵasty. Al alǵashqy ondyqqa Sıdneı, Tsıýrıh, Jeneva, Osaka, Adelaıda, Vankýver jáne Tokıo qalalary kirdi.
– Reıtıng 173 qalany qamtıdy jáne 30-dan astam kórsetkish negizinde jasalady. Olar turaqtylyq, densaýlyq saqtaý, mádenıet pen qorshaǵan orta, bilim berý jáne ınfraqurylym sekildi bes negizgi sanatqa biriktirilgen, – delingen EIU esebinde.
Álem boıynsha ómir súrý qolaılylyǵynyń ortasha kórsetkishi ótken jylǵy deńgeıde qalyp, 100 baldyń 76,1-in qurady.
Zertteýge sáıkes, Batys Eýropa ómir súrýge eń qolaıly óńir bolyp qaldy. Onyń ortasha kórsetkishi – 91,7 ball. Odan keıin 90,4 balmen Soltústik Amerıka tur.
2026 jyly eń aıtarlyqtaı ósim Azııa elderinde baıqaldy. Buǵan Qytaı qalalaryndaǵy densaýlyq saqtaý salasy kórsetkishteriniń jaqsarýy jáne Japonııadaǵy oń ózgerister áser etken.
Sonymen qatar EIU sarapshylary turaqtylyq kórsetkishiniń tómendep jatqanyn atap ótti. Barlyq qala boıynsha ortasha kórsetkish 0,5 balǵa azaıǵan.
Eń úlken tómendeý Taıaý Shyǵys pen Soltústik Afrıka óńirinde tirkeldi. Maskat pen El-Kýveıt reıtıngte tıisinshe 14 jáne 12 orynǵa tómendedi.
Reıtıngtiń sońǵy ornynda taǵy da Damask qaldy. Odan keıin Trıpolı, Dakka, Karachı jáne Aljır ornalasqan.
Al eń joǵary ósim kórsetken qalalar qatarynda Qytaıdyń Fýchjoý, Ýsı, Nankın jáne Chjýhaı qalalary, sondaı-aq Lıssabon bar. Nıý-Iork turaqtylyq kórsetkishiniń jaqsarýy nátıjesinde úsh satyǵa kóterildi.
Aıta keteıik, Qazaqstan TMD elderi arasynda kóshýge eń qolaıly memleket atandy.
