Kópbeıindi ortalyq aýdandyq aýrýhanalardy jańǵyrtý bıyl aıaqtalady
ASTANA. KAZINFORM — Bıyl jyl sońyna deıin kópbeıindi ortalyq aýdandyq aýrýhanalardy jańǵyrtý aıaqtalady. Bul týraly Densaýlyq saqtaý mınıstrliginen málim etti.
Mınıstrliktiń atap ótýinshe, «Aýyldyq densaýlyq saqtaýdy jańǵyrtý» ulttyq jobasy aıasynda medıtsınalyq-sanıtarııalyq alǵashqy kómek uıymdaryna qajettilikti qalyptastyrý óńirlik ákimdikterdiń derekteri negizinde halyq sany eskerile otyryp jáne densaýlyq saqtaý uıymdary jelisiniń memlekettik normatıvine sáıkes aýyldyq eldi mekenderdi irikteý jolymen júzege asyryldy. Bul rette MSAK nysandarynda qosymsha fızıoterapııa, dárihana pýnktteri, oblystyq jáne respýblıkalyq klınıkalardyń jetekshi dárigerlerimen telemedıtsınalyq konsýltatsııalar uıymdastyrý úshin kompıýterlik jáne medıtsınalyq tehnıka kózdelgen.
— Ulttyq joba aıasynda dıagnostıkaǵa arnalǵan apparattardy, zerthanalyq qurylǵylardy, sondaı-aq telemedıtsınaǵa arnalǵan júıelerdi qosa alǵanda, aýyldyq medıtsınalyq mekemelerdi zamanaýı jabdyqtarmen jańartý jáne jaraqtandyrý qarastyrylǵan. Bul aýyl turǵyndaryna jergilikti jerde sapaly medıtsınalyq qyzmetter alýǵa múmkindik beredi, — dedi vedomstvodan agenttiktiń resmı saýalyna oraı.
«Aýyldyq densaýlyq saqtaýdy jańǵyrtý» jobasynda 2023 2026 jyldary aralyǵynda aýdandyq aýrýhanalardy tıisti bólimshelerdi ashý arqyly kópbeıindi ortalyq aýdandyq aýrýhanalardy túrlendirý, sondaı-aq jaqyn mańdaǵy aýdandardyń halqyna mamandandyrylǵan medıtsınalyq kómekti jaqyndatý úshin joǵary mamandandyrylǵan jabdyqtar baǵyttary boıynsha (KT, MRT, angıograftar, dıagnostıkalyq jabdyqtar (ÝDZ), zerthanalyq jabdyqtar, reanımatsııalyq jabdyqtar, rentgen-dıagnostıkalyq, fızıoterapııalyq, hırýrgııalyq jáne endoskopııalyq beıneaqparattyq jabdyqtar) olardy jańǵyrtý (kúrdeli jóndeý/rekonstrýktsııalaý, qosymsha jabdyqtaý) qarastyrylǵan.
— Kópbeıindi ortalyq aýdandyq aýrýhanalardy jańǵyrtýdy 2026 jyldyń sońyna deıin aıaqtaý josparlanǵan, — dep atap ótedi mınıstrlikten.
Aıta keteıik, «Aýyldyq densaýlyq saqtaýdy jańǵyrtý» jobasy aıasynda medıtsınalyq nysan salý jospary 100 paıyz oryndaldy.
