Kópbalaly otbasylarǵa turǵyn úı alý úshin jeńildikpen nesıe usynyldy

NUR-SULTAN. QazAqparat - Kópbalaly otbasylarǵa turǵyn úı alý úshin jeńildikpen nesıe usynylady. Atalmysh júıeniń sharttary týraly QR Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov aıtty, dep habarlaıdy QR Premer-Mınıstriniń baspasóz qyzmeti.

Baspasóz málimetterine qaraǵnda, jeńildikpen nesıelendirý az qamtylǵan, kópbalaly, tolyq emes jáne múmkindigi shekteýli balalardy tárbıelep otyrǵan otbasylarǵa arnalǵan.

M. Jaıymbetov atap ótkendeı, qarjy Turǵyn úı qurylys jınaq banki arqyly úsh jyl boıy 50 mlrd teńgeden bólinip otyratyn bolady. Barlyǵy 18 myń zaım bólinedi.

«Úsh aınalym bolady dep josparlap otyrmyz. Sonda 25 jyl ishinde 56 myń zaım bólinedi. 56 myń zaım - bul tıisinshe, 56 myń páter. Paıyzdyq mólsherlemesi - 2%. Nesıelendirý merzimi -20 jyl. Bastapqy jarnasy -10%. 18 myń zaımǵa 150 mlrd teńge bólindi», - dedi Komıtet tóraǵasy.

Onyń aıtýynsha, 2019 jylǵy 1 qańtardaǵy jaǵdaı boıynsha turǵyn úı alý kezeginde 487 myń adam turdy. Onyń ishinde halyqtyń áleýmettik áljýaz toptarynan 220 myńǵa jýyq adam bar. Kópbalaly, az qamtylǵan otbasylar - 28 126 adam. І toqsanda olardyń sany 3 myń adamǵa artty. Qazir bul kezekte 31 700 astam adam tur.

«7 jyl boıy jyl saıyn ákimdikte kezekte turǵandar úshin 40 myńnan astam jalǵa beriletin turǵyn úı salynady. Jyl saıyn 6 myń páter paıdalanýǵa beriledi. Kópbalaly analar men «Altyn alqa», «Kúmis alqa» ıegerleri jáne «Batyr ana» ataǵyn alǵandar úshin jeke kezek bolady. Olar jalǵa beriletin turǵyn úıdi birinshi kezekte alý quqyǵyna ıe», - dedi M. Jaıymbetov.

Sonymen qatar, kópbalaly otbasylarǵa turǵyn úı alý quqyǵyn beretin turǵyn úı sertıfıkatyn engizý josparlanǵan.

«Biz qazir turǵyn úı sertıfıkaty boıynsha erejelerdi ázirlep jatyrmyz. Jergilikti atqarýshy organdar arqyly 5 jyl ishinde 85 mlrd tg bólinedi. Árbir ákimdik óz múmkindiginshe qarajat bóledi. Eger buǵan deıin osyndaı qarajat dárigerler, muǵalimder, polıtseıler úshin «Nurly jer», «7-20-25» baǵdarlamalary boıynsha bólinse, endi kópbalaly, tolyq emes jáne múmkindikteri shekteýli balalardy tárbıelep otyrǵan otbasylarǵa berilsin degen usynys bar», - dep túıindedi Komıtet tóraǵasy.