Kópbalaly otbasylarǵa páterdi jalǵa berýdiń talaptary qandaı
Májilistiń jalpy otyrysynan keıin QR Indýstrııa jáne ınfraqurylymdyq damý vıtse-mınıstri Qaıyrbek Óskenbaevtan tilshiler kópbalaly otbasalarǵa jalǵa berilgen páterdi paıdalaný merzimi týraly surady.
«Balalary eseıgennen keıin, otbasy músheleri baspanadan shyǵaryla ma?», -degen saýal qoıyldy.
«Páterdi eshkim de alyp qoımaıdy, olar sonda qala beredi. Bul satyp alý quqynsyz jalǵa beriletin baspana. Sondyqtan turyp jatqan otbasylar shyǵarylmaıdy», - dedi vıtse mınıstr.
Sonymen qatar ol kópbalaly otbasylar úshin jalǵa beriletin páterdiń quny týraly aıtyp berdi.
«Sharshy metri úshin 115 teńge bolady. Qazirgi kezde onyń quny óńirler boıynsha ózara baılanystyrylmaǵan. Degenmen aýyldyq nemese qalalyq jerlerge qaraı baǵanyń belgilenýi turǵysynda ózgerister engizemiz», - dedi Q. Óskenbev.
Aıta keteıik, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn maquldady.
Onyń aıasynda «Altyn alqa», «Kúmis alqa» alǵandar nemese buryn «Batyr ana», sondaı-aq birinshi jáne ekinshi dárejeli «Ana dańqy» ataǵyn alǵan kópbalaly analar men kópbalaly otbasylar sanaty úshin turǵyn úı alýǵa jeke kezek engizý qarastyrylǵan.
Zań jobasynda kezeke turǵyzylǵan kópbalaly otbasylar men kópbalaly analar baspanany alǵanǵa deıin tizimnen shyǵarylmaıtyny kórsetilgen.
«Eger de kópbalaly otbasy búginde kezekte tursa, olar páter alǵanǵa deıin osy kezekte tura beredi. Balalardyń keıbiri kámeletke tolsa da, bul jaǵdaı atalǵan otbasyny kezekten shyǵarýǵa negiz bola almaıdy. Zań jobasyndaǵy jańalyqqa toqtalsaq, bul norma «Altyn alqa», «Kúmis alqa» alǵandar nemese buryn «Batyr ana», sondaı-aq birinshi jáne ekinshi dárejeli «Ana dańqy» ataǵyn alǵan kópbalaly analarǵa da taralady», - dedi Májilis depýtaty Shavhat Ótemisov zań jobasyn tanystyrý barysynda.
