Kópbalaly otbasylarǵa daıyn úılerdi alyp berýge qomaqty qarjy bólindi

ASTANA. QazAqparat - Kópbalaly otbasylarǵa daıyn turǵan úılerdi satyp alyp berý úshin 25 mlrd teńge bólindi. Bul týraly búgin Úkimet otyrysynda «Nurly jer» baǵdarlamasy boıynsha baıandama jasaǵan QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.

«Jappaı turǵyn úı qurylysy júrip jatqan aýdandarǵa ınjenerlik jelilerdi salý úshin bıyl 81,7 mlrd teńge bólý qarastyrylyp otyr. Óńirlerdi qarjylandyrýdy bastap kettik. Satyp alý quqyǵynsyz jalǵa beriletin turǵyn úılerdiń qurylysy úshin óńirlerge respýblıkalyq bıýdjetten 32,8 mlrd teńge qarastyrylǵan. Shamamen 4,5 myń páterdiń qurylysy josparlanýda», - dedi mınıstr.

Onyń aıtýynsha, Elbasynyń «Nur Otan» partııasynyń XVІІІ sezinde bergen tapsyrmalaryn iske asyrý úshin 2019 jylǵa bıýdjetti aıqyndaý aıasynda kópbalaly otbasylar úshin jaldamaly turǵyn úıdiń qurylysyna jáne satyp alýǵa óńirlerge 50 mlrd teńge bólý qarastyrylǵan.

«Jalpy atalǵan is-sharaǵa 7 jyl ishinde 350 mlrd teńge qarastyrylǵan. Bul jyl saıyn 6 myń kópbalaly otbasyny pátermen qamtamasyz etýge múmkindik beredi. ıAǵnı, 7 jylda 40 myńnan astam páter beriledi degen sóz», - dedi ol.

R.Sklıardyń sózine qaraǵanda, bul úshin búgin 25 mlrd teńgeniń qurylys jobalarynyń tizimi jasalǵan. Daıyn páterlerdi satyp alý úshin 25 mlrd teńge qarastyrylǵan. Bul kópbalaly otbasylardyń turǵyn úı máselelerin sheshýdi tezdetýge yqpal etedi. Lımıt somasy óńirlerdegi əkimdikterde kezekte turǵan kópbalaly otbasylardyń sanyna negizdeledi.

«Mysaly, Túrkistan oblysynda 4 832 kópbalaly otbasy kezekte tur. Osyǵan baılanysty óńirge proportsıonaldy 8,6 mlrd teńge bólinýde. Bul qarajattan 4,3 mlrd teńge qurylysqa, qalǵan 4,3 mlrd teńge daıyn páter satyp alýǵa beriledi. Soltústik Qazaqstan oblysyndaǵy 342 otbasyǵa beriletin lımıt 700 mıllıon teńgeni quraıdy», - dedi mınıstr.