Kópbalaly otbasylardyń úı máselesin jeke kezek boıynsha sheshý kerek - Sansyzbaı Esilov
ASTANA. QazAqparat - Astana qalasy Qoǵamdyq keńesiniń tóraǵasy Sansyzbaı Esilov elordadaǵy kópbalaly otbasylardyń máselesi týraly aıtyp berdi, dep habarlaıdy QazAqparat tilshisi.
«Biz naqty kópbalaly otbasylardyń máselesin qarastyrǵan joqpyz. Biraq, Qoǵamdyq keńestiń músheleri, meniń ózim de elordada oryn alǵan oqıǵalardyń bárine - bes balany jerlegende, Kongres holda kópbalaly analar jınalǵan kezde de boldym. Iá, másele óte ózekti. Biraq, bárin de qalalyq ákimdik nemese biz sheshe almaımyz. Biz zańnama aıasynda jergilikti bılikpen birlese jumys júrgizemiz. Memleket tarapynan kórsetiletin kómek, baspana máselesin sheshý - Úkimetke, Parlamentke baılanysty. Barlyq sharýa zańnamalyq turǵyda rettelip otyrýy kerek», - deıdi Sansyzbaı Esilov elorda ákimdiginde ótken jıynda.
Qoǵamdyq keńes tóraǵasy óz sózinde kópbalaly analarmen kezdesken kezde qandaı oı túıgenin aıtyp berdi.
«Meniń ózim Astanada týyp óstim. Bizdiń qalanyń halqy 20 jyldyń ishinde úsh jarym esege kóbeıgenin kórip otyrmyz. Qazaqstannyń túkpir-túkpirinen halyq kóship kelip jatyr. Olardyń áreketteri de túsinikti: bári de jaqsy ómir izdeıdi, balamnyń bolashaǵy jarqyn bolsyn dep oılaıdy. Alaıda kóship kelip jatqandardyń keıbiri óz kúshi men múmkindigin eskere de bermeıtinin de aıta ketý kerek. Kongres holda áıeldermen kezdeskenimde bir áıel maǵan Túrkistan oblysynan kóship kelgenin, jeti balasy baryn, úıinde otyrǵanyn, al kúıeýiniń jumysy turaqsyz ekenin aıtyp berdi. Men odan «Túrkistan oblysynda úıińiz ben sharýashylyǵyńyz bar ma edi?» dep suraǵanymda, úıin satyp jibergenin jetkizdi. Biraq, «Máskeý kóz jasyńa» senbeıdi degen bar... Adamdar basqa sharýa túgili qarapaıym tirkeý máselesin sheshe almaı jatyr», - deıdi ol.
Sansyzbaı Esilov turaqty tirkeýi joq bolǵannan keıin kópbalaly otbasylar memleket tarapynan tıesili jeńildikterge ıe bola almaı otyrǵanyn atap ótti.
«Memleket bul máselege bet burar degen oıdamyn. Qazirgi ýaqytta Úkimet jumys tobyn quryp, atalmysh máseleni sheshýdi kózdep otyr. Kópbalaly otbasylardyń eń aldymen baspana máselesin sheshý kerektigi týraly bastamany 100 paıyz qoldaımyz. Sebebi, bul otbasylar kúrdeli materıaldyq jaǵdaıymen qosa baspanany jaldap turýǵa májbúr. 50-100 myń teńgege kishkene ǵana bólme jaldap turady. Sol sebepti, kópbalaly otbasylardyń eń aldymen baspana máselesin sheshý kerek. Jetim balalardyń, soǵys ardagerleri sanatyndaı kópbalaly otbasylardyń baspana boıynsha jeke kezegi bolýy tıis. Sebebi, qazirgi ýaqytta elordadaǵy baspana boıynsha ortaq kezekte 46 myńǵa jýyq adam tur», - deıdi Sansyzbaı Esilov.
