Kópbalaly otbasylardy baspanamen qamtý: Úkimet basshysy Qyzylorda oblysyn úlgi etti
Úkimet basshysynyń tóraǵalyǵymen ótken keńes barysynda QR Tuńǵysh Prezıdenti - Elbasy Nursultan Nazarbaevtyń tabystary tómen kópbalaly jáne tolyq emes otbasylarǵa, múmkindikteri shekteýli balalary bar otbasylarǵa turǵyn úıdiń qoljetimdiligin arttyrý týraly tapsyrmalaryn oryndaý máseleleri talqylandy.
Premer-Mınıstrdiń aıtýynsha, Úkimet pen ákimdikter atalǵan baǵytta jumystardy júrgizip jatyr. Bıyl mamyr aıynda kópbalaly otbasylarǵa páterler berile bastaıdy. Bes jyl ishinde jalpy 28 myń páter berilmek. Kópbalaly otbasylardy baspanamen qamtamasyz etý úshin turǵyn úı qurylys jınaǵy júıesi arqyly turǵyn úı zaımdaryn berýdiń jeńildikti tetigi ázirlendi.
Indýstrııa jáne ınfraqurylymdyq damý mınıstri R. Sklıar baspananyń qoljetimdiligin arttyrý boıynsha qabyldanyp jatqan sharalar týraly baıandady.
Keńes barysynda Qyzylorda oblysynyń halyqtyń áleýmettik álsiz tobynyń turǵyn úı máselesin sheshýdegi tájirıbesi erekshe atalyp ótti. «Balameken» jobasy aıasynda Qyzylorda oblysynyń ákimdigi kópbalaly otbasylardyń baspana máselesin sheshýdi kózdeıtin B. Ótemuratovtyń jekemenshik qorymen birlesip óteýsiz negizde beriletin úılerdi salýdy bastady.
Qyzylorda oblysynyń ákimi Q. Kósherbaev pen Qor dırektory M. Aıtmaǵambetov jobany iske asyrý týraly aqparat berdi. Jumys komıssııasy Qyzylorda qalasy boıynsha qolaısyz turǵyn jaǵdaılarynda ómir súrip jatqan 150 otbasyny anyqtady. Olarǵa páterler beriletin bolady: 50 otbasy jergilikti bıýdjet qarajaty esebinen baspanamen qamtylady, 100 otbasy «Balameken» jobasy aıasynda baspanaǵa ıe bolmaq. Jalpy alǵanda, Qordan úılerdiń qurylysyn qarjylaı qoldaýǵa 450 mln teńge bólingen.
Oblys ákimdiginiń derekterine sáıkes, bir sharshy metr turǵyn úıdiń quny 70 myń teńgeni quraıtyn bolady. Úıler osy jyldyń 1 qyrkúıegine qaraı paıdalanýǵa beriledi. Buǵan qosa, belgilengen merzimge qaraı qajetti ınjenerlik ınfraqurylym júrgizý jumystary (elektr qýaty, gaz, sý, telefon baılanysy, avtojoldar jáne t. b.) aıaqtalady, sondaı-aq árbir otbasyǵa 6 sotyq jer telimi bólinedi.
Budan ózge, Qyzylorda oblysynyń kópbalaly otbasylarynyń ishinen az qamtylǵan otbasylarǵa arnalǵan jaldamaly turǵyn úı baǵdarlamasyn iske asyrýǵa qosymsha 3,6 mlrd teńge bólindi. Bul 470 páterdi quraıtyn 10 úıdi salýǵa jol ashady. Jalpy, bıyl oblysta 1966 páterdi quraıtyn 45 kópqabatty turǵyn úı salynady, olardyń basym bóligi muqtaj azamattarǵa bólinedi.
Keńes qorytyndysyn shyǵara otyryp, QR Premer-Mınıstri Asqar Mamın halyqtyń ál-aýqatyn jaqsartýǵa bıznes ókilderi de óz úlesterin qosýy kerek ekenin aıtty.
Ol Qyzylorda oblysynyń oń tájirıbesin paıdalanýdy tapsyryp, bıznes ókilderin áleýmettik álsiz otbasylarǵa áleýmettik qoldaý kórsetý jobalaryn iske asyrýǵa shaqyrdy.
Keńes qorytyndysy boıynsha Qyzylorda oblysynyń ákimdigi men «Bolat Ótemuratov qory» jekemenshik qory arasynda Yntymaqtastyq týraly memorandýmǵa qol qoıyldy.
