Kópbalaly otbasylar nesıeni qıyn jaǵdaıdan shyǵý úshin alady - «Kúmis alqa» ıegeri

ORAL. QazAqparat - Prezıdenttiń nesıeni óteý jónindegi Jarlyǵy bizdi de qýantty. Bul týraly Terekti aýdany Fedorov aýylynda turatyn «Kúmis alqa» ıegeri Aqtilek Qapıeva málim etti, dep habarlaıdy QazAqparat tilshisi.

Onyń aıtýynsha, kópbalaly otbasylar nesıeni qıyn jaǵdaıdan shyǵý úshin alady.

«Prezıdent biz sııaqty kóp balaly otbasylardyń nesıesin jabý týraly Jarlyq shyǵardy degendi estigende, bastapqyda senbegen edim. Keıin ózim oqyǵannan keıin kózim jetti. Bul shynynda da kóp bala tárbıelep otyrǵan ata-analarǵa úlken kómek. Muny óte durys sheshim dep esepteımin», - deıdi Aqtilek Qapıeva.

Onyń sózine qaraǵanda, otbasynda eri ekeýi alty bala tárbıeleýde. Memleket tarapynan budan buryn da qoldaý kórsetilip keledi. Ataýly áleýmettik kómek alady, ózderi jumys jasaıdy.

«Biz buǵan deıin jalǵa alǵan páterde turyp kelgen edik. Jýyrda aýdan ortalyǵynda kezegimiz kelip, kóp qabatty úıden jańa páter aldyq. Endi, mine, Prezıdent kóp balaly otbasylardyń aıaǵynan qaz turyp ketýine úlken qoldaý kórsetip otyr. Nesıe adamnyń moınynan túspese, qıyn, árıne. Odan qutylǵannan keıin ár otbasy óz jaǵdaıyn túzeı alady dep oılaımyn. Sol úshin memleketke rızamyz», - dedi Aqtilek Qapıeva.