Kópbalaly memlekettik qyzmetshiler mindetti rotatsııalaýdan bosatylmaq – agenttik
NUR-SULTAN. QazAqparat – Kópbalaly memlekettik qyzmetshilerdi mindetti rotatsııalaýdan bosatý usynylady. Búgin Parlament Májilisinde tıisti zań jobasyn tanystyrý barysynda QR Memlekettik qyzmet isteri agenttigi tóraǵasynyń orynbasary Marat Dáýeshev málim etti, dep habarlaıdy QazAqparat tilshisi.
«Kópbalaly ata-ana bolyp sanalatyn memlekettik qyzmetshilerdi mindetti rotatsııalaýdan bosatý usynylady. Bul norma olardyń áleýmettik qorǵalýyn arttyrýǵa múmkindik beredi. Ádette, tórt jáne odan da kóp balanyń bolýy basqa jerge kóshýdi qıyndatady. Osyǵan baılanysty kópbalaly ata-analarǵa mindetti túrde rotatsııaǵa jatatyn basshylyq qyzmetterinen bas tartýǵa týra keledi», - dep túsindirdi M. Dáýeshev.
Budan buryn habarlanǵandaı, Májiliste Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasy tanystyryldy.
Qujat aıasynda Qazaqstanda saıası laýazymdarǵa biliktilik talaptaryn belgileý usynyldy.
Zań jobasymen 1 kodekske («Ákimshilik quqyq buzýshylyq týraly» kodekske) jáne 4 zańǵa («Agroónerkásiptik keshendi jáne aýyldyq aýmaqtardy damytýdy memlekettik retteý týraly», «Qazaqstan Respýblıkasynyń Ulttyq qaýipsizdigi týraly», «Qazaqstan Respýblıkasynyń memlekettik qyzmeti týraly», «Qazaqstan Respýblıkasynyń Joǵary sot keńesi týraly») túzetýler engiziledi.
