Kópbalaly áskerıdiń ótemaqysyn eki esege qysqartty - sot sheshimi
ASTANA. QazAqparat - Aqtaý garnızonynyń áskerı sotynda alty balasy bar er adamnyń shaǵymy qaraldy. Óz aryzynda ol komandırdiń turǵyn úı ótemaqasyn eki esege qysqartý týraly buıryǵyna narazylyq bildirdi, dep habarlaıdy QazAqparat tilshisi.
Sot materıaldaryna sáıkes, S. esimdi azamat QR Ulttyq qaýipsizdik qyzmetiniń Shekara qyzmetinde áskerı qyzmet atqarǵan. Sol kezde oǵan Aqtaý qalasynan qyzmettik páter berildi. Artynan áskerı bólimniń turǵyn úı komıssııasy oǵan qyzmettik páterdiń ornyna aqshalaı ótemaqy berý týraly sheshim shyǵardy.
Ótken jyly tamyz aıynda áskerı bólimniń komandıri arnaıy buıryq shyǵaryp, S.-nyń otbasyna 31 405 374 teńge kólemindegi ótemaqyny belgiledi. Sebebi onyń otbasynda jeti adam bar. Alaıda, kóp uzamaı, komandır ol buıryqqa ózgeris engizdi. Otbasy músheleriniń jeti adamnyn tórt adamǵa qysqarýyna baılanysty ótemaqynyń mólsheri 17 945 928 teńgege deıin qysqartyldy. Osydan keıin S. komandırdiń buıryǵymen kelispeı, sottyń kómegine júgindi.
Sot otyrysy barysynda aryz berýshi azamattyń otbasy quramyna birinshi nekeden týǵan úsh balasyn engizgeni anyqtaldy. Búginde úsheýi de kámeletke tolmaǵan jáne ákesimen birge turmaıdy. S. burynǵy áıeline alıment tólep turady.
«Osyǵan baılanysty sot buıryqqa engizilgen ózgeristerdi durys dep tapty. Aryz berýshi áskerı azamat 7 adam úshin ótemaqy ala almaıdy. Aqtaý garnızonynyń áskerı soty onyń aryzyn qanaǵattandyrmady. Sot sheshimi kúshine engen joq», - delingen resmı habaralmada.
