Kópbalaly analarǵa materıaldyq kómek kórsetildi - Qostanaı

QOSTANAI. QazAqparat - Nur Otan partııasy qalalyq fılıalynyń qoǵamdyq qabyldaý bólmesinde turǵyndardyń jeke máseleleri qaraldy, dep habarlaıdy QazAqparat.

Qoǵamdyq qabyldaýǵa 5 adam jazylǵan. Solardyń biri - Vıktorııa Gaja. Ol jeke sot oryndaýshylaryna shaǵym aıtyp keldi.

«Atqarýshylyq úkimniń merzimi ótse de, maǵan syrt oblystarǵa shyǵýǵa shekteý qoıdy. Buǵan qosa menshigimde múlikterdi tárkilemek», - dedi Vıktorııa Gaja kómek surap.

Qostanaı oblysy Ádilet departamenti basshysynyń orynbasary Ashat Júnisovtiń sózinshe, mundaı jaǵdaıda qala turǵyny jazbasha ótinim jasaýy tıis. Másele jaqyn arada sheshimin tabady.

Taǵy bir qala turǵyny Natalıa Işenko materıaldyq kómek suraıdy. Ol úsh balany jalǵyz tárbıelep otyr. Joldasymen ajyrasqan.

«Qoldan kelgendi jasaımyz. Kópbalaly jáne az qamtylǵan otbasylardy qoldaý - memlekettik saıasattyń basty baǵytyna aınalyp otyr. Muny memleket basshysy basa aıtty. Sondyqtan, ázirge qalalyq máslıhat azyq-túlik jaǵynan materıaldyq kómek kórsetedi. Al áleýmettik máseleler boıynsha Jumyspen qamtý jáne áleýmettik baǵdarlamalar bóliminiń basshylyǵy járdemdesedi», - dedi Nur Otan partııasy Qostanaı qalalyq fılıaly tóraǵasynyń birinshi orynbasary Manarbek Sultanǵazın.

Qoǵamdyq qabyldaýǵa kelgen 4 balanyń anasy Galına Oljabaevaǵa da qalalyq máslıhat depýtattary materıaldyq kómek usynatynyn jetkizdi. Sonymen qatar, kópbalaly ana Ásel Mırmanovaǵa 109 myń teńge somasynda qarajat berildi.

Taǵy bir turǵyn Nurahmet Arystanov 10 jyl boıy turyp kele jatqan páterin jekeshelendirýge qatysty suraq qoıdy.

Manarbek Sultanǵazın oǵan qalalyq ákimdikke jazbasha ótinish joldaý týraly keńes berdi.