Kópbalaly analarǵa qoldaý bolǵan bastama
NUR-SULTAN. QazAqparat - Prezıdent Qasym-Jomart Toqaevtyń turmysy tómen otbasylardyń nesıesin memleket óteıtini týraly Jarlyǵy, kópbalaly analarǵa qoldaý boldy, dep habarlaıdy QazAqparat tilshisi.
Nesıe alyp, tómen turmystyq jaǵdaıyna baılanysty tóleı almaı otyrǵan kópbalaly analar memleket tarapynan jeńildik jasalatynyna qatysty pikir bildirýde. Elimizde osyndaı máselesi bar 500 myńǵa jýyq azamat tirkelgen.
«Memleket basshysynyń el turǵyndarynyń nesıelerin jabýǵa jeńildik jasaıtyn bastamasyn estip, qýandym. Otbasyn asyraýshy azamattardyń jalaqylary aılyq nesıe kólemin tólegennen keıin, turmystyq qajettilikterge, jaldamaly páterine jetpeı jatady. Meniń 5 balam bar, bireýi múgedek. Emdetýge qarjy tappaı, nesıe alǵan kezderimiz boldy. Sondyqtan, nesıeni tóleýge memleket járdem jasasa, osyndaı máseleleri bar azamattarǵa qoldaý bolmaq», - degen pikir bildiredi kópbalaly ana Sandýǵash Myrzabekova.
Eske sala keteıik, mundaı jeńildik kópbalaly otbasylar, asyraýshysynan aırylý jaǵdaıyna baılanysty tólem alatyn otbasylar, múgedek balalary bar, 18 jastan asqan, bala jasynan múgedekter bar otbasylar, ataýly memlekettik áleýmettik kómek alatyndar, jetim balalar, ata-anasynan kámelettik jasqa deıin aıyrylǵan, jıyrma toǵyz jasqa tolmaǵan, ata-ananyń qamqorlyǵynsyz qalǵan balalarǵa beriledi.
