Kópbalaly analardyń máselesi sheshimin tapty - Jeńisgúl Muhambetpaıyzova

AQTÓBE. QazAqparat - «Nur Otan» partııasynyń sezine qatysqan aqtóbelik depýtat kópbalaly analardyń suraǵyna jaýap tabylǵanyna rıza, dep habarlaıdy QazAqparat tilshisi.

Aqtóbeden Astanaǵa barǵan deleget óńirde túsindirý, jańa bastamalardy halyqqa jetkizý baǵytynda jumys isteıdi. Aqtóbe oblystyq máslıhat depýtaty, «Nur Otan» partııasy fraktsııasynyń múshesi Jeńisgúl Muhambetpaıyzovanyń aıtýynsha, qoǵamdyq qabyldaý kezinde aıtylǵan kóp máseleniń búgin oń sheshimi tabyldy.

«Kópbalaly, muqtaj otbasylarǵa áleýmettik járdemaqy berý, ony esepteýde jańa tapsyrmalar berildi. Máselen, endi olar 2-3 paıyzdyq ústemeaqymen nesıe ala alady. Bizge kópbalaly analar dál osy tusta qıyndyqqa kezigetin edi. Olar úshin ıpotekalyq nesıe, alǵashqy jarna jınaý qıyn boldy. Kezdesýlerde analar osy suraqtardyń oń sheshilýin surady. Al búgin Elbasy naqty tapsyrmalar berip, arnaıy qarjy bólinetinin jetkizdi. Ári 40 myń páter salynady. Bul da analarymyz úshin úlken kómek», - dedi J.Muhambetpaıyzova.

Aıta keteıik, aqtóbelik depýtat gaz, sý qubyryn jetkizý de aýyl halqy úshin jaqsy jańalyq dep sanaıdy. Bul baǵytta Aqtóbede josparly jumys júrip jatyr. 2019-2020 jyldary 13 aýyldy gazdandyrý boıynsha is atqarylady. Sol kezde aqtóbelikterdiń 89 paıyzy kógildir otyndy paıdalanady.

«Bul jańalyqty el, aýylǵa jetkizemiz. Bizdiń mindetimiz atqarylatyn isterdiń ár qadamyn túsindirý, kómektesý», - dedi ol.