Kópbalaly analar men qandastardyń múddesin qorǵaıtyn ýákil ınstıtýty qurylmaq
ASTANA. QazAqparat – QR Prezıdenti janynan áleýmettik turǵyda osal sanalatyn toptyń quqyqtaryn qorǵaýmen aınalysatyn ýákil ınstıtýty qurylmaqshy. «Ashyq NQA» portalynda Memleket basshysynyń jarlyq jobasy jarııalandy, dep habaralaıdy QazAqparat tilshisi.
«Jobany qabyldaýdyń maqsaty – azamattardyń quqyqtary men zańdy múddeleriniń kepildigin qamtamasyz etý, sondaı-aq olardyń buzylǵan quqyqtary men bostandyqtaryn memlekettik jáne qoǵamdyq ınstıtýttarmen birlesip qalpyna keltirý maqsatynda óz qyzmetin erikti negizde júzege asyratyn Halyqtyń áleýmettik osal sanattarynyń quqyqtary jónindegi ýákil ınstıtýty engizý», - dep jazylǵan túsindirmede.
Jobada ýákilge qandaı fýnktsııa beriletini aıtylǵan.
«Ýákildiń negizgi maqsattary osy Jarlyqqa qosymshada kórsetilgen halyqtyń áleýmettik jaǵynan osal sanattarynyń quqyqtary men zańdy múddeleriniń kepildikterin qamtamasyz etý, sondaı-aq memlekettik jáne qoǵamdyq ınstıtýttarymen ózara is-qımylda olardyń quqyqtary men bostandyqtaryn qalpyna keltirý bolyp tabylady dep belgilensin», - delingen qujatta.
Sonymen atalǵan Ýákil myna 10 sanattaǵy azamattardyń quqyqtary men zańdyq múddelerin qoǵaıtyn bolady:
1) Uly Otan soǵysynyń ardagerleri;
2) jeńildikteri boıynsha Uly Otan soǵysynyń ardagerlerine teńestirilgen ardagerler;
3) basqa memleketterdiń aýmaǵyndaǵy urys qımyldarynyń ardagerleri;
4) múgedektigi bar adamdar;
5) múgedektigi bar balalary bar nemese olardy tárbıelep otyrǵan otbasylar;
6) ataýly áleýmettik kómek alýshylar;
7) asyraýshysynan aırylý boıynsha járdemaqy alýshylar;
8) jasyna qaraı zeınet demalysyna shyqqan zeınetkerler;
9) qandastar;
10) «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, sondaı-aq I jáne II dárejeli «Ana dańqy» ordenderimen nagradtalǵan kópbalaly analar, kópbalaly otbasylar.
