Kópbalaly ana, tilshi, metsenat: «Qaıyrymdylyq kerýeni» júldesi kimge buıyrdy

NUR-SULTAN. QazAqparat – Búgin elordadaǵy «Qazaqstan» ortalyq kontsert zalynda «Qaıyrymdylyq kerýeni» jobasynyń jeńimpazdary marapattaldy. Jomart jandarǵa QR Tuńǵysh Prezıdenti – Elbasynyń qory jáne Qazaqstannyń isker áıelder qaýymdastyǵy qurmet kórsetti, dep habarlaıdy QazAqparat.

Osymen ekinshi jyl qatarynan ótkizilip otyrǵan baıqaýǵa qatysýshylar áleýmettik, qoǵamdyq problemalardy sheshýge ári jomarttyǵymen basqalardy meıirimdilikke yntalandyrýǵa úles qosyp júrgen jandar.

Baıqaýdyń mańyzdylyǵyn ataǵan QR Parlamenti Senatynyń tóraǵasy, QR Tuńǵysh Prezıdenti – Elbasy qorynyń dırektory Darıǵa Nazarbaeva: «Baıqaý jeńimpazdaryn izdeý barysynda jobamyzdyń jumys toby san túrli ǵajap adamdarmen kezdesti.

Olardyń arasynda kásipker-metsenat, ÚEU ókilderi, muǵalimder, fermerler, dárigerler, zeınetkerler, stýdentter jáne tipti, mektep oqýshylary bar. Jyl sanap saıysqa qatysýshylardyń qatary artyp kele jatqanyna óte qýanyshtymyz. Eger alǵashqy «Qaıyrymdylyq kerýeni» baıqaýyna 97 adam qatyssa, búginde 231 adam baq synap otyr. Bárińizge nemquraıly bolmaı, patrıotızm, jaýapkershilik pen meıirimdilik tanytqandaryńyz úshin alǵys aıtqym keledi. Sizderdiń árqaısylaryńyz bizge, ásirese jas urpaqqa úlgi-ónegesizder!», - dedi.

Konkýrs jeńimpazdary 5 nomınatsııa boıynsha marapattalyp, olarǵa I, II jáne III dárejeli medaldar, sondaı-aq «Oqjetpes» shıpajaıyna joldamalar, aqparattyq seriktester - «Habar» agenttigi men «KTK» telearnasynan baǵaly syılyqtar tapsyryldy.

Jarystyń eń joǵary nagradasy – І dárejeli medalmen marapattalǵandar:

- «Asar» nomınatsııasy – almatylyq Aljan Alashabaevaǵa berildi. Ol qazaqtyń ulttyq mádenıetin saqtaýǵa jáne damytýǵa baǵyttalǵan jobany júzege asyrýda. Sonymen qatar, onyń jobasy kózi kórmeıtin jáne kórý qabileti nashar balalardyń tanym kókjıegin arttyrý arqyly olardy qoǵamǵa beıimdeýge baǵyttalǵan;

- «Týǵan jer» nomınatsııasy Jambyl oblysynan kelgen Lázzat Jabataevaǵa buıyrdy. Lázzat erekshe patrıotızm kórsetkeni úshin marapattaldy. Ol Túrkistan oblysyndaǵy týǵan aýyly Sháýildirge balabaqsha saldy. Sarykemer aýylynda óz qarajatyna sporttyq-saýyqtyrý keshenin salyp, qural-jabdyqpen qamtamasyz etti ári respýblıkalyq «Batys qaqpasy» tasjolynda «Qaınar» medıtsınalyq ortalyq nysanyn turǵyzdy. Sonymen qatar ol jyl saıyn qaıyrymdylyqqa 7 mıllıon teńgege deıin qarajat bóledi;

- «Meıirim jolynda» nomınatsııasy Nur-Sultan qalasynyń turǵyny Janar Baıjúldenovaǵa tabystaldy. Janar - kópbalaly ana, qoǵam qaıratkeri. Óziniń mańyzdy jobasynda patronattyq tárbıe, jetim balalar men ata-anasynyń qamqorlyǵynsyz qalǵan balalarǵa otbasyn tabýǵa kómektesý tájirıbesin nasıhattaıdy. Eki balanyń anasy 2012-2016 jyldar aralyǵynda 11 sábı asyrap alǵan;

- Óskemendik Aıbek Ábdirahmanov «Batyl júrek» nomınatsııasyna ıe boldy. Ol 7 adamnan turatyn otbasyn órtten qutqardy. Ótken jyldyń qyrkúıek aıynda úıge qaıtyp kele jatqanda Aıbek otqa oranǵan úıdi kóredi. Oılanbastan janyp jatqan úıge kirip, adamdardyń shyǵýyna kómektesip, erlik jasady;

- «Qaıyrymdylyq tarıhy» nomınatsııasy Qyzylorda oblysynan kelgen Tolqyn Qabylshaǵa tabystaldy. Ol «Qazaqstan» respýblıkalyq telearnasynyń oblystyq fılıalynyń tilshisi. Tolqyn qaıyrymdylyqpen aınalysady, turmysy tómen otbasylarǵa kómek kórsetý sharalaryna da belsendi atsalysady.