Kópbalaly ana «sýper áje» atandy
ASTANA. QazAqparat - «Shańyraq» mádenı-bos ýaqyt ortalyǵynda Táýelsizdik kúni qarsańynda qalalyq ákimdiktiń qoldaýymen «Sýper áje-2018» baıqaýy ótti, dep habarlaıdy pavlodarnews.kz.
Saıysqa 65 jáne odan joǵary zeınetkerlik jastaǵy on áje qatysty. Baıqaýdyń maqsaty - aǵa urpaqqa qurmet sezimin tárbıeleý, qart adamdardy qala men oblystyń mádenı jáne qoǵamdyq ómirine belsendi qatysýǵa tartý.
Sharany uıymdastyrýshy búginde qarttar úıinde turyp jatqan birinshi toptaǵy múmindigi shekteýli Valentına Tolmacheva mundaı oı bıyl jazda Almatyda Amerıka elshiliginiń demeýshiligimen ótken halyqaralyq festıvalge qatysqanda paıda bolǵanyn aıtady.
«Sol jıynda úlkenderge, ájelerge qalaı qurmet kórsetiletini týraly aıtyldy. Budan keıin nelikten bizde de osyndaı sharalar uıymdastyrmasqa degen oı keldi. Mysaly, bizge ájeler ózderi toqyǵan zattardy ákelip, únemi kóńil bólip jatady. Al, olarǵa Qarttar kúni ǵana nazar aýdarylady. Sondyqtan bul oıymdy dostarym, ınternat birden qoldap, demeýshiler tabyldy. Eriktiler men barlyq kómek kórsetken jandarǵa rızashylyǵym zor. Búgingi qatysýshylardyń barlyǵy «Sýper áje» degen ataýǵa laıyq», - deıdi Valentına Tolmacheva.
Baıqaý tórt kezeń boıynsha ótti. Birinshi kezeńde úmitkerlerdiń balalary, nemereleri óziniń otbasy men otbasylyq dástúrlerin, ájeleri týraly aıtyp, beınematerıal arqyly tanystyrdy. «Barmaqtan bal tamǵan» kezeńinde árbir qatysýshyǵa nemereleri úshin daıyndalǵan aspazdyq sheberligin kórsetý múmkindigi usynyldy. Qazylar alqasy astyń dámin, túrin jáne ózgeshe usynylýyn baǵalady.
«Segiz qyrly, bir syrly» kezeńinde qatysýshylar ózderiniń shyǵarmashylyq qabiletterin kez kelgen óner janrynda - vokal, kórkem sóz, aspapta oınaý arqyly kórsetti. «Sán saltanaty» bóliminde keshki kóılek úlgisin kórsetti.
«Bes balany ósirip, jetkizip, nemere-shóbere súıip otyrmyn. Solardyń tamaǵyn jasap, mektepke alyp baramyn. Búgin óz qolymyzben jasaǵan jumystardy kórsettik. Onyń ishinde toqyma buıymdary, sýretter men túrli taǵamdar bar. Óz basym qazaqtyń ulttyq asy - besbarmaq pisirip ákeldim. Jasym 69-da. Analarǵa arnalǵan án oryndadym. Buryn zaýytta aspazshy bolyp jumys istegenmin. Bul baıqaý týraly ulym aıtyp, qatysýymdy ótindi» - deıdi Baqyt Jaraqbaeva.
Qazylar alqasynyń sheshimi boıynsha bas júldeni búginde bes baladan segiz nemere men bes shóbere súıgen Sholpan Imanova jeńip aldy.
Shańyraq qurǵanyna 50 jyl tolǵan otbasy altyn toıyn atap ótken. Otanasy 20 jyl zaýytta, keıin mádenıet bóliminde jumys istegen. Zeınetkerlikke shyqqannan keıin «Zamandas» horynyń qataryna qosylǵan. Bul otbasy ár mereke saıyn dastarhan basynda jáne tabıǵat aıasynda bas qosýdy dástúrge aınaldyrǵan.
