Kópbalaly ana: Balalardyń shotyna ulttyq qor tabysyn aýdarý – bolashaqqa ınvestıtsııa
Zaısan aýdany Daıyr aýylynda turatyn Gúlnaz Janaeva jubaıymen birge 4 bala tárbıelep otyr. Kúıeýi aýylda elektrshi, al ózi úı sharýasynda.
Olar 1 qyrkúıek kúni Memleket basshysy Qasym-Jomart Toqaevtyń Joldaýyn teledıdardan kórgen.
«Ózim kópbalaly ana bolǵandyqtan, árıne, birinshi kezekte Ulttyq qordyń jyldyq tabysynyń jartysy ár balanyń esepshotyna 18-ge tolǵansha aýdarylatyndyǵyn estigende qatty qýandym. Bul - bolashaqqa quıylǵan ınvestıtsııa. Sebebi eldiń keleshegi – balalardyń qolynda», - deıdi Gúlnaz Janaeva.
Onyń aıtýynsha, sońǵy jyldary Qazaqstanda kópbalaly otbasylarǵa jan-jaqty qoldaý kórsetilýde. Osynyń arqasynda halyq sany artatyndyǵy sózsiz.
«Memlekettiń qolǵa alyp jatqan sharalaryn kórgen erli-zaıyptylar úshinshi, tórtinshi balalaryn ómirge ákelip jatyr. Aı saıyn beriletin járdemaqy úlken kómek. Baspanamen qamtylyp jatqandar da kóbeıdi. Ózimiz kezegimizdi tosyp júrmiz. Jańa Joldaýda bala kútimine baılanysty tólenetin aı saıynǵy járdemaqy ýaqyty 1 jyldan bir jarym jylǵa sozylatyndyǵy kóptiń kóńilinen shyqty. Sebebi buǵan deıin bir jyl ótken soń járdemaqy taýsylǵandyqtan analar qosymsha tabys izdeýge májbúr boldy. Olardyń áleýmettik jelilerde úıde otyryp qyrýar tabys tabýǵa shaqyratyn alaıaqtardyń tuzaǵyna túsip te jatqany shyndyq», - deıdi kópbalaly ana.
Óz sózinde ol aýyl medıtsınasyn damytýdyń mańyzy zor ekendigin jetkizdi.
«Joldaýda aýyldarda medıtsınalyq jáne feldsherlik-akýsherlik pýnkt salynatyndyǵy, aýdandyq aýrýhanalardyń zamanaýı jańartylatyndyǵy aıtyldy. Ashyǵyn aıtqanda, aýyldarda medıtsına sapasy tómen. Halyqtyń jappaı qalaǵa kóship jatýynyń basty sebepteriniń biri osy. Eger eldi mekenderde turǵyndardyń densaýlyǵyn kútetin jaqsy medıtsınalyq mekemeler ashylsa, aýylyn tastap ketetinder azaıar edi», - deıdi Gúlnaz Janaeva.
