Kópbalaly otbasynda eki egizden keıin úshem dúnıege keldi
ALMATY. KAZINFORM — Almaty qalasy Qoǵamdyq densaýlyq saqtaý basqarmasynyń Qalalyq perınataldyq ortalyǵynda dúnıege úshem keldi.
Úsh birdeı qyz balanyń baqytty ata-anasy Elmıra Rysmanova men onyń jubaıy Nurmahan Álibaev.
— Balalardyń anasy 31-shi aptasynda qalalyq perınataldyq ortalyǵyna túsken. Merziminen buryn bosaný qaýpine jáne úshtik júktiliktiń erekshelikterine baılanysty oǵan shuǵyl kesar tiligi jasaldy, — delingen habarlamada.
Tájirıbeli dárigerlerdiń sátti jasalǵan operatsııasynyń nátıjesinde úsh qyz dúnıege keldi.
Birinshi qyzdyń salmaǵy — 1711 gramm, boıy 43 sm, ekinshi sábıdiń salmaǵy — 1748 gramm, boıy 40 sm, úshinshi arýdyń salmaǵy — 1493 gramm, boıy 40 sm.
Olarǵa Fatıma, Zýhra jáne Aısha esimderi berildi.
— Sábıler birden jańa týǵan nárestelerdiń reanımatsııa bólimine ornalastyryldy. Olarǵa barlyq qajetti kómek kórsetilip jatyr. Ómirleriniń alǵashqy mınýttarynan bastap qyzdar dárigerlerdiń qamqorlyǵy men jiti baqylaýynda. Perınataldy ortalyq mamandarynyń kásibıliginiń arqasynda náresteler qýattanyp, densaýlyǵy kúnsaıyn nyǵaıyp keledi, — delingen habarlamada.
Erekshe júktiliktiń barlyq qıyndyǵyna qaramastan, 36 jastaǵy ana da qazir ózin jaqsy sezinip, dárigerlerge qoldaý kórsetkenderi úshin alǵys aıtty.
— Bul meniń úshinshi egizderim. Bizdiń otbasymyzda 2019 jáne 2022 jyldary dúnıege kelgen 2 juptan egizderimiz ósip jatyr. 2025 jyly dúnıege úshem ákeldim. Allaǵa shúkir, endi bizde 10 bala bar. Qalalyq perınataldyq ortalyqtyń akýsher-gınekologtaryna, dárigerlerine jáne barlyq mamanǵa shyn júrekten alǵys aıtamyn. Dárigerlerdiń kásibıliginiń jáne qamqorlyǵynyń arqasynda bári sátti ótti, — deıdi kópbalaly ana Elmıra Rysmanova.
Qalalyq perınataldyq ortalyqtyń basshylyǵy medıtsınalyq ujymnyń joǵary kásibıligin alǵa tartyp otyr. Sonyń arqasynda úshemniń bosanýyn sátti ótkizip, úsh balanyń ómirin saqtap qalý jáne uqypty túrde emdelýin qamtamasyz etý múmkin bolǵan.
Bul bıylǵy jyly perınataldyq ortalyqta dúnıe esigin ashqan alǵyshqy úshem.
Ótken jyly Almaty qalalyq perınataldyq ortalyǵy 16 700-den astam ana men olardyń jańa týǵan nárestelerine medıtsınalyq kómek kórsetti, 9014 balanyń dúnıege kelýine járdemdesti. Ortalyq qaladaǵy barlyq merziminen buryn bosanǵan áıelderdiń 62% qabyldaǵan.
Aıta ketelik Oralda úshem bosanǵan kópbalaly ana perzenthanadan shyqqany týraly jazǵan edik.