Kópbalaly otbasylar men nagradtalǵan analar 56,5 mlrd teńgeden astam járdemaqy aldy
ASTANA. KAZINFORM –2026 jylǵy qańtar aıynda kópbalaly otbasylarǵa jáne nagradtalǵan analarǵa beriletin memlekettik járdemaqylarmen 875,2 myń otbasy jalpy somasy 56,5 mlrd teńge mólsherinde qamtyldy, dep habarlaıdy QR Eńbek jáne halyqty áleýmettik qorǵaý mınıstrliginiń bapasóz qyzmeti.
Onyń ishinde: kópbalaly otbasylarǵa beriletin járdemaqymen – 627,4 myń otbasy 49,2 mlrd teńgege; nagradtalǵan anaǵa beriletin járdemaqymen – 247,8 myń adam 7,3 mlrd teńgege qamtyldy.
Kópbalaly otbasyǵa beriletin memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady.
Kópbalaly otbasylarǵa tólenetin járdemaqy mólsheri balalar sanyna baılanysty saralanady jáne 2026 jyly mynadaı kólemde belgilengen:
- 4 balasy bar otbasylarǵa – 16,03 AEK nemese 69 330 teńge;
- 5 balaǵa – 20,04 AEK nemese 86 673 teńge;
- 6 balaǵa – 24,05 AEK nemese 104 017 teńge;
- 7 balaǵa – 28,06 AEK nemese 121 360 teńge;
- 8 jáne odan da kóp balasy bar otbasylarǵa – ár balaǵa 4 AEK nemese
17 300 teńge.
Nagradtalǵan anaǵa beriletin járdemaqy «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan analarǵa taǵaıyndalady.
Atalmysh járdemaqy aı saıyn kelesi mólsherde tólenedi:
«Kúmis alqa» alqasymen nagradtalǵan analarǵa – 6,40 AEK nemese
27 680 teńge;
«Altyn alqa» alqasymen nagradtalǵan nemese buryn «Batyr Ana» ataǵyn alǵan, І jáne ІІ dárejeli «Ana dańqy» ordenderimen nagradtalǵan analarǵa – 7,40 AEK nemese 32 005 teńge.
2026 jylǵy 1 qańtardan bastap balaly otbasylarǵa taǵaıyndalatyn memlekettik járdemaqylardyń mólsheri 10%-ǵa artqanyn atap ótemiz.
Aıta keteıik, byltyr qazaqstandyqtarǵa 746 mlrd teńgege járdemaqy men áleýmettik tólem tólendi.