Qopa kóline 40 myń balyq jiberildi
KÓKShETAÝ. QazAqparat - Búgin Aqmola oblysynyń ákimi Málik Myrzalın Kókshetaýdaǵy Qopa kóline balyq jiberý sharasyna qatysty, dep habarlaıdy QazAqparat tilshisi.
Aqmola oblysynyń tabıǵı resýrstar jáne tabıǵatty paıdalanýdy retteý basqarmasynyń basshysy Rýslan Áýbákirovtyń aıtýynsha, bul joly Qopa kóline Zerendi balyq pıtomnıginde ósirilgen 40 myń aq amýr jáne dóńmańdaı balyqtary jiberildi.
«Bul balyqtardyń erekshelegi olar kóldiń astyndaǵy shópter men baldyrlardy jep kóldi tabıǵı jolmen tazartýǵa múmkindik beredi. Jalpy, kóldi aımaq sanalatyn Aqmola óńiri úshin mundaı sharanyń mańyzy zor», - deıdi Rýslan Áýbákirov.
Sharaǵa qatysqan aımaq basshysy qorshaǵan orta úshin paıdasy zor ıgi istiń aldaǵy ýaqytta da jalǵasyn taba beretinin atap ótti.
Eske sala keteıik, ótken jyldyń qarasha aıynda osy Qopa kóline 13 myńǵa jýyq aq amýr jáne 3 myńǵa tarta dóńmańdaı balyǵy jiberilgen bolatyn.
