Kóp jaıt tártipke baǵynýymyzǵa baılanysty - Pavel Kazantsev karantın jaıynda
NUR-SULTAN. QazAqparat - Koronavırýs indetiniń ekinshi tolqynynan qalaı ótetindigimiz ózimizdiń is-áreketimizge baılanysty. Mundaı pikirdi QR Parlamenti Májilisiniń depýtaty Pavel Kazantsev bildirdi, dep habarlaıdy QazAqparat tilshisi.
«Karantınniń jeńildetilýmen qatar belgili bir qaýipterdiń kúrdelene túsýi qatar júredi. Koronavırýsqa qatysty bul qaýipter memlekettik qurylymǵa ne bolmasa aýrýhanalardaǵy tósek-orynǵa emes, adamnyń mentalıtetine, adamdardyń baıyppen nemese júrdim-bardym qaraýyna, elimizde týyndaǵan ortaq problemaǵa adamı birige bilýine baılanysty. Dál osy deńgeıde, koronavırýsqa qatysty qazirgi jaǵdaıda bul úlken qaýip týyndaıdy»,- dedi ol.
Osy rette Májilis depýtaty qaýipti dertti juqtyryp almaý adamnyń ózine jáne tártibine baılanysty ekendigin aıtqan Elbasynyń úndeýine tolyq qosylatyndyǵyn bildirdi.
«Elbasy bizge adamdar tártipke, ózin-ózi oqshaýlaýǵa, baılanystardy qysqartýǵa jaýapkershilikpen qaraǵan elderde adamdar narazylyq tanytatyn, maska taǵýǵa májbúrleıtin elderge qaraǵanda protsestiń jeńil ótetindigin kórsetip berdi. Elbasy úndeýi der ýaqytynda jasalyp otyr ári óte mańyzdy. Túptep kelgende árbir adam bul sózderdi jete túsinýi qajet. Іndet juqtyryp, ózgelerge taratpaý úshin ózińe, ózińdi qorshaǵan ortaǵa jaýapkershilikpen qaraǵan jón», - dedi Májilis depýtaty.
Pavel Kazantsevtiń aıtýynsha, adamdardyń barlyǵy koronavırýs indetiniń ekinshi tolqyny oryn alatyndyǵyn túsinip otyr. Al onyń aýyr álde jeńil ótetindigi bul problemaǵa adamdardyń baıyppen qaraýyna baılanysty.
«Koronavırýs indetiniń ekinshi tolqynynan qalaı ótetindigimiz ózimizge jáne tártibimizge, is-áreketterimizge baılanysty», - dedi ol.
Aıta keteıik, keshe QR Densaýlyq saqtaý mınıstrligi 17 tamyzdan keıin karantın qalaı jeńildeıtinin túsindirgen edi.
