Kóp ultty ustazdar otbasy qazaq halqyna alǵys aıtty
ASTANA. QazAqparat - Elbasy N.Nazarbaevtyń Jarlyǵymen kóktemniń alǵashqy kúni Alǵys aıtý kúni bolyp belgilengen bolatyn. Osy kún qarsańynda Qazaq memlekettik qyzdar pedagogıkalyq ýnıversıtetiniń rektory Dınar Nóketaeva «Nur Otan» partııasynyń «Esikten esikke deıin» aktsııasy boıynsha kóp ultty ustazdar otbasymen kezdesti.
Bul týraly atalǵan ýnıversıtet baspasóz qyzmetinen habarlady.
Jyly shyraıly kezdesýde D.Nóketaeva qoǵam aldyndaǵy ustazdar mártebesin arttyrý baǵytynda atqaratyn jumystary jóninde jetkizdi.
Sanaly ǵumyrlaryn bilim salasynyń damýyna, shákirt tárbıeleýge arnap kele jatqan ustazdar áýletin jurtshylyq jaqsy biledi. Shańyraqtyń otanasy, ulty bashqurt Flora Baratova bar ómirin bala tárbıeleýge arnaǵan jan. Ulty uıǵyr, marqum otaǵasy da 25 jyldan astam ǵumyryn bilimge arnap, mektep dırektory bolǵan. Qazir ulaǵatty ustazdyń ul-qyzdary men kelinderi de ata-ana jolyn qýyp, aǵartý salasynda abyroıly qyzmet atqaryp júr. Bir dastarhan basynda otyrǵan úsh qyzy Gúlstan, Shatmıra, Razmıra Baratovalar da muǵalim. Bir aıta keterligi, olardyń barlyǵy Qazaq memlekettik qyzdar pedagogıkalyq ýnıversıtetiniń túlekteri.
Óz kelinderiniń arasynda tatar ultynyń qyzy da bar jáne qazaq, orys otbasylaryna nemere qyzdaryn berip, qudandaly bolyp, tatý-tátti ómir súrip jatqany kózge súıenish. Nemereleriniń arasynda da ustazdyq joldy tańdaǵandary kóp. Bul Baratovtar otbasynda muǵalimdiktiń atadan balaǵa mıras dástúrli mamandyq ekenin aıǵaqtaıdy. Eńbek jolyn qarapaıym ustazdyqtan bastaǵan Flora Garaıqyzy túrli basshylyq qyzmetterdi atqaryp, ómirdiń nebir synynan múdirmeı ótken. 84 jastaǵy keıýana kezdesýde Uly Otan soǵysy surapylynda týǵan jerlerinen kóshirilip kelgen san myń ulysqa ortaq shańyraq bolǵan qazaq eline, qazaq jurtyna úlken alǵysyn bildirdi.
«Qıyn-qystaý kezinde bizge baýyrmaldyq kórsetken, jan jylýyna bólegen qazaq baýyrlaryma, rııasyz kómegin bergen qaıyrymdy qazaq dostaryma, ókinishke oraı olardyń kóbisi bul ómirde joq, qushaq jaıa qarsy alyp, bar kómegin aıamaǵan Qazaq eline myń alǵysymdy aıtqym keledi. Biz qazaqtyń keńpeıildigi, baýyrmaldylyǵynyń arqasynda osy jerde jaıly orta, pana taptyq, úıli boldyq, ósip-óndik. Mine, 7 balamnan 20 nemere, 18 shóbere kórip otyrmyn. Elimizge bereke, birlik, beıbit ómir tileımin. Bizdiń kórgen beınetimizdi jas urpaq kórmesin. Turaqtylyq, tatýlyq bolǵan memlekette ǵana osyndaı jaqsylyq bolady», - deıdi F. Garaıqyzy.
Kezdesý sońynda kitapty ómirim dep tanıtyn, túrli óleńderdi jatqa aıtýdy unatatyn keıýana qazaq halqyna alǵysy retinde «Qazaqstan - táýelsiz ǵajap meken» atty tatar jáne qazaq tilderinde ózi shyǵarǵan arnaý óleńin oqyp, jınalǵandarǵa aq batasyn berdi.
