Kóp páterli turǵyn úılerdi kondomınıým nysany retinde tirkeý ońaılatylady
Sonyń biri kóp páterli turǵyn úılerdi kondomınıým nysany retinde tirkeý tártibi rettelip, ońaılatylady.
Páter ıeleri kooperatıvteri basshylarynyń turǵyndarǵa ortaq múlikti olardyń kelisiminsiz satyp jiberýi nemese jalǵa bergeni týraly azamattar tarapynan aryz-shaǵymdar jıi aıtylyp keldi. Endi kúshine engen jańa zań boıynsha mundaı olqylyqtarǵa jol bermeýge bolady. Ol úshin ne isteý kerek?
Eń aldymen, kóp páterli turǵyn úılerdi kondomınıým nysany retinde tirkeý qajet. Jáne onda jer ýchaskesin qosa alǵanda úıdiń jalpy aýdany, ortaq múliktiń quramy, árbir páter men turǵyn emes úı-jaılardyń úlesi mólsheri, jekemenshiktegi páterler men turǵyn emes úı-jaılardyń aýdany anyq kórsetilýi tıis.
Kondomınıýmdy tirkeý arqyly jalpyǵa ortaq múlikke degen quqyqtary zańdyq turǵydan bekitilip, ony basqarýǵa tikeleı qatysa alady. Memlekettik tirkeý úshin keminde 2 adamnan turatyn bastamashy toptyń ótinishi kerek.
Zań boıynsha kondomınıým nysany jalpy múliginiń bir bóligin satýǵa nemese jalǵa berýge tyıym salynady. Tıisti sheshim turǵyndardyń jınalysynda qabyldanýy kerek.
Keıbir qurylys kompanııalary nemese basqarýshy kompanııalar úıdi kondomınıým retinde tirkemeı turyp, onyń bólikterin, ıaǵnı jertólelerin, baspaldaq alańdaryn nemese irgelerin satyp jiberedi. Zań boıynsha mundaı jaǵdaılardyń aldyn alý úshin kondomınıým aýdanyn endi úıdi josparlaý kezinde-aq anyqtap alady. Oǵan qosa, paıdalanýǵa qabyldanǵan kóp pátárli turǵyn úıdiń kondomınıým nysanyn memlekettik tirkeý mindeti úıdi salýshy kompanııaǵa júkteledi.
Eger múlik ıeleri úı mańyndaǵy jer ýchaskesin jalpy múlik quramyna kirgizýdi qalasa, jınalysta tıisti sheshim qabyldap, jergilikti atqarýshy organǵa ótinish bere alady. Olaı bolmaǵan jaǵdaıda jer memlekettik menshikte bolyp, ony kútip-saqtaý shyǵyny bıýdjet esebinen iske asyrylady.
Taǵy bir mańyzdy másele, kondomınıým nysany retinde tirkeý jalpy múlikti basqaryp, paıdalanýǵa múmkindik beretinine qaramastan, qazirgi tańda turǵyndardyń oǵan qyzyǵýshylyǵy tómen bolyp otyr. Óıtkeni, kóp jaǵdaıda úıdiń tehnıkalyq tólqujaty, jer ýchaskesiniń aktisi degen sııaqty qujattary bolmaıdy ári tirkeý sharasy kúrdeli. Nátıjesinde qazir elimizdegi 78 myńnan astam kóp páterli turǵyn úıdiń nebári 21 myńy kondomınıým nysany retinde tirkelgen.
Endi azamattarǵa qolaıly bolýy úshin kondomınıým nysanynyń ortaq múligin anyqtaı otyryp, kóp páterli turǵyn úılerdi memlekettik tehnıkalyq zertteý, memlekettik tirkeýge qajetti qujattardy usyný mindeti jergilikti atqarýshy organdarǵa júktelip, bıýdjet esebinen iske asyrylady.
Sonymen, kóp páterli turǵyn úılerdiń kondomınıýmyn tirkeý sharasy ońaılatyldy. Ol úshin eki menshik ıesinen ótinish jetkilikti. Nysandy tirkeý sharasyn avtomattandyryp, merzimin 1 kúnge deıin qysqartý qarastyrylǵan. Quqyq belgileýshi qujattardyń notarıaldyq rastalǵan qujattaryn usyný talaby alyp tastaldy.
