Kóp qyzmetkeri vaktsına alǵan uıymdarǵa kelýshi sanyn kóbeıtýge ruqsat beriledi

NUR-SULTAN. QazAqparat – Qyzmetkerleriniń 80 paıyzyn vaktsınalaǵan Ashyq júıesindegi kásiporyndarǵa qabyldaıtyn adam sanyn kóbeıtýge ruqsat beriledi. Bul týraly «Atameken» ulttyq kásipkerler palatasynyń basqarma tóraǵasy Abylaı Myrzahmetov aıtty, dep habarlaıdy QazAqparat tilshisi.

«Qyzmet kórsetý salasyndaǵy kásipkerlik nysandardyń qyzmetkerlerin vaktsınalaý merzimi 10 tamyzǵa deıin shegerilgenin bilesizder. Osy shara vaktsınatsııa dınamıkasyna oń áser etti. Bıznes jalpy bul sharanyń qajettigin túsinedi. Basynda óte qysqa merzim berilgen bolatyn. 10 tamyzǵa qaraı sanıtarlyq dárigerlermen birge taǵy pysyqtaımyz dep oılaımyn. Óıtkeni ázirge apta saıyn 7-8 paıyz ósim bar ekenin kórip otyrmyz. Ashyq júıesine enggen bıznes nysandaryndaǵy vaktsınalaýdyń ortasha deńgeıi 30 paıyzdan bastalyp, 47-50 paıyzǵa deıin barady», - dedi palata basshysy.

«Atameken» ókili 2 tamyzda kúshine enetin Bas sanıtar dárigerdiń jańa qaýlysy Ashyq júıesinde adal jumys isteıtin kásipkerlerdi yntalandyrýǵa baǵyttalǵanyn atady.

«Kim jaýapkershilikti túsinip, óz qyzmetkerleri men kelýshilerdiń qaýipsizdigine jaýaptylyqpen qarasa, olarǵa yntalandyrý berilýi kerek. 80 paıyzdan astam qyzmetkeri vaktsına alsa, buryn Ashyq boıynsha 30 paıyz júktelimmen jumys istep júrgen nysanǵa qosymsha 20 paıyz júktelimge ruqsat beriledi. Ashyq júıesinde kelýshilerdi tártipke saı qarsy alyp, vaktsınatsııa kórsetkishin jaqsartqandardyń jumys ýaqyty uzartylady. Osylaısha biz kúshtep emes, yntalandyrý arqyly kórsetkishke qol jetkizemiz», - dedi Abylaı Myrzahmetov.