Kóp qabatty úılerdiń jertólesinde ashylatyn dúkenderdiń basym bóligi zańsyz - turǵyn úı ınspektsııasy
ASTANA. QazAqparat - Búgin Astanada ótken baspasóz máslıxatynda turǵyn úı ınspektsııasynyń basshysy Álıxan Qýatbekov PIK-terdiń qyzmeti jaıynda baıandap, kópqabatty úılerdiń jertólesindegi dúkenderdiń kóp jaǵdaıda zańsyz ashylatynyn jetkizdi, dep xabarlaıdy QazAqparat tilshisi.
Inspektsııa basshysy zańsyz dúkender bolmas úshin kondomınımýmdy erterek tirkeýge keńes berip otyr. "Kondomınımým degenimiz ne? Sol úıge ıelik etip otyrǵan turǵyndardyń quqyqtaryn qamtamasyz etý degen sóz. Negizi, úıdiń jobasy boıynsha jertóleler nemese texnıkalyq qabattarda ornalasqan san alýan nysandar sanıtarlyq-epıdemılogııalyq talaptarǵa sáıkes kelse, qurylys-sáýlet basqarmasyna ótinish berý arqyly onyń maqsatyn aýystyrýǵa bolady. Ókinishke qaraı, búginde kópqabatty úılerdiń astyńǵy qabattarynda ruqsatsyz, tek KSK-men ǵana kelisip alyp, ózderiniń jeke kásipterin ashyp jatqan jaǵdaılar az emes. Biraq ondaı áreketter zańsyz bolyp sanalady", - dedi Á.Qýatbekov QazAqparat tilshisiniń bergen suraǵyna.
Onyń aıtýynsha, turǵyn úı ınspektsııasy zańsyz dúkenderdi teksere almaıdy. Degenmen, úıdiń turǵyndary óz aryz-shaǵymdaryn sáýlet-qurylys basqarmasyna, sondaı-aq memlekettik sáýlet-qurylys baqylaý qyzmetine bere alady. Atalǵan organdar tıisti sharalardy qoldanady.
Al turǵyn úı ınspektsııasy óz kezeginde PIK-terdiń qarjylyq esep berýin qadaǵalaı alady. Búgingi zańnamaǵa sáıkes, páter ıelenýshiler kooperatıvi, ıa bolmasa, qyzmet kórsetýshi kompanııa árbir toqsan saıyn turǵyndardyń aldynda qarjyny jumsaý boıynsha esep berýi tıis. Ol mindet oryndalmasa, aıyppul salynady.
