Kóp balaly otbasylarǵa 42 myń páter jalǵa beriledi

NUR-SULTAN. QazAqparat - Aldaǵy 7 jyldyń ishinde kóp balaly otbasylar úshin 42 myń jalǵa beriletin páter salynatyn bolady. Bul týraly Qurylys jáne turǵyn úı kommýnaldyq sharýashylyq isteri komıtetiniń tóraǵasy Marhabat Jaıymbetov búgin Nur-Sultan qalasynda ótken kóp balaly jáne az qamtylǵan otbasylarmen kezdesý barysynda málim etti, dep habarlaıdy QazAqparat tilshisi.

«Elbasynyń «Nur Otan» partııasynyń XVIII sezinde bizge tapsyrǵan negizgi úsh tapsyrmasy bar. Ol aldymen baspana máselesi, ekinshi halyqty taza aýyzsýmen qamtý jáne jergilikti jerlerdegi jol máselesin sheshý. Berilgen tapsyrmadan soń biz Qazaqstannyń ár óńirindegi 50 shaqty eldi mekende bolyp, turǵyndarmen kezdesý uıymdastyrdyq. Halyqtyń muń-muqtajyn tyńdaı otyryp baıqaǵanymyz, kómek-qoldaý surap kelgen turǵyndardyń 70-80% baspana máselesin sheship berýdi surady», - dedi komıtet tóraǵasy Marhabat Jaıymbetov.

Onyń aıtýynsha, búginde elimizde 340 myń kóp balaly otbasy bar, onyń 28 126 turǵyn úı kezeginde tur jáne sońǵy eki jyl ishinde 1193 otbasy baspanaly boldy.

«Buryn memleket tarapynan kóp balaly otbasylarǵa jylyna 600 páter beriletin bolsa, bıyldan bastap bul kórsetkish on esege artyp, endi jyl saıyn 6 myń páter beriledi. Bul maqsatqa bıýdjetten 50 mlrd teńge qarjy qarastyrylǵan. ıAǵnı, aldaǵy 7 jyldyń ishinde (2019-2025 jj) kóp balaly otbasylar úshin 42 myń jalǵa beriletin páter salynatyn bolady. Onyń ishinde Nur-Sultan qalasyna toqtalsaq 7 jyl ishinde 616 páter salynady, bul úshin 5 mlrd teńge qarajat bólinedi», - dedi ol.

Komıtet basshysynyń deregine súıensek, elimiz boıynsha turǵyn úı kezeginde turǵan kóp balaly otbasylardyń kóshin Túrkistan oblysy bastap tur - 4832 otbasy, ekinshi orynda Almaty oblysy - 3149 otbasy, tıisinshe úshtikti Nur-Sultan qalasy túıindeıdi, elordada 2888 otbasy baspanaǵa muqtaj.

«Bul sharalardan bólek, memleket tarapynan kóp balaly jáne az qamtylǵan otbasylar úshin tómen paıyzdyq zaımmen baspana alý múmkindikteri qarastyrylýda. Bul kezekti kútpeımin degen otbasylarǵa arnalady. Ol úshin bıýdjetten 150 mlrd teńge qarajat bólindi. ıAǵnı, aldaǵy 3 jyldyń ishinde 18 myń zaım beremiz, bul degenimiz 18 myń otbasy baspanaly bolady degen sóz. Mysaly, bir otbasy jeńildetilgen paıyzben 8 mln teńgeniń páterin kredıtke alsa, ol alǵashqy 8 jyl 42,1 myń teńge, odan keıingi jyldary 27,4 myń teńge tóleıtin bolady. Osy baǵdarlama sátti júzege asyrylǵan jaǵdaıda 56 myń páterge deıin jeńildetilgen zaımmen berý jospary bar», - dedi M. Jaıymbetov.