Kóp balaly ananyń turǵyn úı alý kezegi qalpyna keltirildi
ASTANA. QazAqparat - Batys Qazaqstan oblystyq sotynyń azamattyq ister jónindegi sot alqasy kóp balaly ananyń quqyǵyn qorǵap, ony turǵyn úı alý kezeginde turǵan tizimge qaıtadan aldy.
Oral qalasynyń №2 sotynyń 2016 jylǵy 24 tamyzdaǵy sheshimimen A.Rasqalıevanyń Oral qalasy ákimine "Turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi " MM-niń 2016 jylǵy 3 maýsymdaǵy №1580 Qaýlysyn taný jáne turǵyn úı alý kezegin qalpyna keltirý týraly talap aryzynan bas tartylǵan.
Apellıatsııalyq satydaǵy sot birinshi satydaǵy sottyń sheshimin joıa otyryp, talapty qanaǵattandyrý týraly jańa sheshim shyǵardy.
Іstiń máni boıynsha, 1990 jyldyń jeltoqsan aıynda A.Rasqalıeva 4 balasy bolýyna baılanysty "kóp balaly otbasy" sanaty boıynsha turǵyn úı alýǵa kezegine esepke qoıylǵan.
Ol 25 jyldan astam ýaqyt boıy turǵyn úı alý kezeginde turǵan. Biraq 2016 jyldyń maýsymynda buryn, 1995 jyly 2 bólmeli páterdi jeke menshigine jekeshelendirýine jáne qazirgi ýaqytta balalary ósip ketýine baılanysty kóp balaly otbasy emes degen negizder boıynsha kezekten shyǵarylǵan. Sot alqasy jaýapkerlerdiń QR "Turǵyn úı qatynastary týraly" Zańynyń 73 b. normalaryn buzýyna baılanysty A.Rasqalıeva kezekten zańsyz shyǵarylǵan degen tujyrymǵa keldi. Óıtkeni kóp balaly otbasy halyqtyń áleýmettik osal toptaryna jatady jáne esepten shyǵaryp tastaýǵa jatpaıdy. Olar zańda belgilengen tártippen turǵyn úı alǵanǵa deıin, turǵynjaıǵa muqtaj dep tanylǵan jáne esepke qoıylǵan.
Sondaı-aq, QR "Turǵyn úı qatynastary týraly" Zańynyń 69 b. boıynsha, ol barlyq 4 balasy ózimen birge turýyna, al olar turatyn páter sanıtarlyq jáne tehnıkalyq talaptarǵa saı kelmeı, bólmeleri aralas bolýyna baılanysty turǵyn úıge muqtaj bolyp qala beredi.
Apellıatsııalyq satydaǵy sot jaýapkerler tarapynan anyqtalǵan buzýshylyqtar týraly Batys Qazaqstan oblysy Ákiminiń atyna jeke uıǵarym shyǵardy. Óıtkeni jergilikti atqarýshy organdar osy Zańnyń 71 b. buzyp, turǵyn úıge muqtaj esepte turǵan azamattardyń kezektilik tizimine jyl saıynǵy túgendeýdi júrgizbegen.
