Kóp balaly analarǵa medaldar tapsyryldy
ALMATY. Sáýirdiń 9-y. QazAqparat / Ádilet Musahaev / - QR Prezıdentiniń kóp balaly analardy «Altyn alqa», «Kúmis alqa» medaldarymen marapattaý jónindegi Jarlyǵyna sáıkes, sáýirdiń 7-de Almaty qalasy, Áýezov aýdany ákimdiginde jeti jáne odan da kóp bala týyp, tárbıelep ósirgen bes anaǵa «Altyn alqa» jáne alty balany ómirge ákelgen 23 anaǵa «Kúmis alqa» marapaty saltanatty túrde tabys etildi,
dep habarlaıdy QazAqparat Áýezov aýdany ákimdiginiń baspasóz qyzmetine silteme jasap.
Atalmysh aýdan ákiminiń orynbasary Saıran Saıfedenov kópbalaly analardy quttyqtap, izgi tilegin joldady. «Osyndaı kóp balaly analarǵa memleket tarapynan aı saıyn 8 myń teńge kóleminde járdemaqy tóleý qarastyrylǵan. Sol maqsatta bıýdjetten 30 mıllıard teńgeden astam qarjy bólindi. «Altyn alqa» ıegerleri nemese buryn «Batyr ana» ataǵyn alǵan kóp balaly analar belgilengen mólsherde turǵyn jerlermen qamtamasyz etiletin bolady», dep atap ótti ákimniń orynbasary.
Qazirgi ýaqytta Almatynyń Áýezov aýdanynda eki myńnan astam kóp balaly ana bar. Jyl basynan beri júzden astam ana marapattaýlarǵa ıe bolsa, sonyń 43-i «Altyn alqa» ıegeri atanǵan.
