Kóp balaly ana: Memleket basshysynyń nesıege baılanysty Jarlyǵy qatty qýantty
NUR-SULTAN. QazAqparat - Nur-Sultan qalasynda tirshilik keship jatqan kóp balaly ana Samal Jarova búgin qol qoıylǵan QR Prezıdenti Qasym-Jomart Toqaevtyń azamattardyń borysh júktemesin azaıtý jónindegi Jarlyǵyna baılanysty pikirimen bólisti, dep habarlaıdy «QazAqparat» HAA tilshisi.
«Bul biz úshin kútpegen jańalyq boldy, sol sebepti basynda qalaı qabyldarymyzdy da bilmeı qaldyq. Mundaı ózgeristerge óte qýanyshtymyz. Bizdiń de nesıemiz bar, tólenbegen az bóligi qaldy», - dedi ol. Onyń oıynsha, turǵyndar arasyndaǵy áleýmettik aýyrtpalyqty tómendetýge septigin tıgizetin atalmysh shara der kezinde qabyldandy.
S.Jarova budaz ózge de ıgi ózgerister bolyp jatqanyn atap ótti. «Árqashan báriniń jaqsy bolatynyna sengiń keledi. Balalarymyzdyń bolashaǵy jarqyn bolatynyna senemiz. Biz turatyn Qosshy kentinde joldar jóndelip, jaryq pen sý qubyrlary ornatyla bastady», - dedi S.Jarova.
Aıta keteıik, búgin QR Prezıdenti Qasym-Jomart Toqaev «Qazaqstan Respýblıkasy azamattarynyń borysh júktemesin azaıtý sharalary týraly» Jarlyqqa qol qoıdy. Jarlyqta QR Úkimetine ekinshi deńgeıli bankterdegi jáne mıkroqarjy uıymdaryndaǵy kepilsiz tutynýshylyq qaryzdary óteý boıynsha birjolǵy sharalar qabyldaýǵa tapsyrma berildi.
Atalǵan qaryzdar boıynsha boryshkerler: kópbalaly otbasylar, asyraýshysynan aırylý jaǵdaıyna baılanysty tólem alatyn otbasylar, múgedek balalary bar, 18 jastan asqan, bala jasynan múgedekter bar otbasylar, ataýly memlekettik áleýmettik kómek alatyndar, jetim balalar, ata-anasynan kámelettik jasqa deıin aıyrylǵan, jıyrma toǵyz jasqa tolmaǵan, ata-ananyń qamqorlyǵynsyz qalǵan balalar bolyp otyr.
