Kóp adamdar materıaldyq kómek emes, qıyndyqtan shyǵar jol suraıdy - Nazgúl Maqjan
NUR-SULTAN. QazAqparat - «Shapaǵat» halyqtyq jobasy psıholog Darmına Popovamen birlesip, halyqtyń áleýmettik osal tobyna arnaıy trenıng ótkizdi, dep habarlaıdy QazAqparat.
Psıhologııalyq trenıngtiń maqsaty - ómirdiń qıyndyǵyna tap bolǵan azamattardy alǵa jeteleý. Olardy básekege qabiletti bolýyna uıytqy bolady. Munda halyqtyń áleýmettik osal tobyna jatatyn jáne basqa sanattaǵy adamdarǵa zańgerlik, psıhologııalyq kómek kórsetiledi. Tegin oqý kýrstary arqyly jańa mamandyqty ıgerýge múmkindik beriledi.
Kásibı psıholog jalǵyzbasty, kópbalaly jáne erekshe balalardy tárbıelep otyrǵan analarǵa ómir kúres ekenin jáne kúreskerler ǵana jeńimpaz bolatynyn túsindirdi.
«Osyndaı trenıng ótkizý ıdeıasy kópten beri oıymyzda júrdi. Bizge keletin áıel adamdardyń basym bóligi ómirlerin ózgertkileri keledi. Olar bizden materıaldyq kómek emes, qıyndyqtan shyǵar jol kórsetýdi suraıdy», – dedi «Shapaǵat» halyqtyq jobasynyń jetekshisi Nazgúl Maqjan.
Aktsııa áıelderdiń ózderine degen senimin arttyrý arqyly olardy daǵdarystan shyǵarýdy kózdeıdi. Darmına Popovanyń sózinshe, barlyǵy qyz-kelinshekterdiń óz qolynda.
«Mundaı áıelder aınalasyndaǵy adamdarǵa kómek kórsete alatyndaryn biledi. Biraq jaqsylyq jasaýdyń jolyn tappaıdy. Olar bala ósirýmen jáne tárbıeleýmen ǵana shektelmeýge tıis. Áıel adamdardyń osaly joq. Olardyń jigerin janyp, úmiti men senimin oıatý kerek. Bul úshin ishte jasyrynyp jatqan depressııany joıý qajet. Máseleni sheshýdiń eń alǵashqy qadamy osy», – dedi Darmına Popova.
