Kooperatıvter týraly 5 zańnyń ornyna bireýin qabyldaý qajet - QR Aýyl sharýashylyǵy mınıstri

ASTANA. QazAqparat - Kooperatıvter týraly 5 zańnyń ornyna «Aýyl sharýashylyǵy kooperatıvteri týraly» bir zań qabyldaý qajet. Bul týraly búgin QR Parlamenti Senatynda «Qazaqstan Respýblıkasyndaǵy kooperatsııa máseleleri boıynsha zańnamany jetildirý» taqyrybynda ótken dóńgelek ústel barysynda QR Aýyl sharýashylyǵy mınıstri Asyljan Mamytbekov málim etti.

«Búgingi tańda kooperatsııalar qyzmeti 5 zańmen retteledi. Olar: «Tutynýshylyq kooperatsııalar týraly», «Óndiristik kooperatsııalar týraly», «Aýyldyq tutynýshylyq kooperatsııalar týraly», «Aýyl sharýashylyǵy seriktestikteri men qaýymdastyqtar týraly», «Sý paıdalanýshylary aýyldyq tutynýshylar kooperatıvti týraly» Zańdar», - dedi ol. Mınıstrdiń atap ótýinshe, atalǵan 5 zańnyń bir-birine qarama-qaıshy keletin tustary kóp. Bul zańdardyń talaptaryn oryndaý úshin biliktiligi joǵary zańger maman qajet. Olaı bolmaǵan jaǵdaıda kooperatıv basqarma jıynynyń sheshimine narazylyq tanyta alady. «Jalpy biz 5 zańnyń ornyna «Aýyl sharýashylyǵy kooperatıvteri týraly» bir zań qabyldaýdy usynamyz», - dedi mınıstr.