Kooperatıvke qosylatyn sharýalardyń 50 paıyz shyǵynyn memleket óteıdi - AShM

ASTANA. QazAqparat - Agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasy aıasynda kooperatıvterge birigetin fermerlerge 6 paıyzdyq nesıeler beriledi. Budan bólek, kooperatıvke satyp alynǵan qondyrǵylardyń 50 paıyzy memlekettiń esebinen óteledi, dep xabarlaıdy QazAqparat tilshisi.

"Mysaly, sút kooperatıvi qurylatyn bolsa, ol jerde sút qabyldaý beketi ashylady. Onyń quny ortasha eseppen 4,5-5 mıllıon teńge deıik. Sony satyp alýǵa beriletin nesıe 6 paıyzben beriledi. Kepilzat qoıýdyń qajeti joq. Sebebi sút qabyldaý qondyrǵynyń ózi kepilzat bolyp sanalady. Ony lızıngke beredi. Sosyn oǵan ketken aqshanyń 30 paıyzy memlekettiń esebinen óteledi. Endi, qazirgi ereje boıynsha 30 paıyz bolyp tur. Degenmen, kelesi jyldan bastap biz erejeni ózgertip, 50 paıyzǵa deıin kóterýdi josparlap otyrmyz. Osylaısha, sút qabyldaý qondyrǵysyn satyp alsańyz, onyń 2,5 mıllıon teńgesin memleket tólese, qalǵany nesıe retinde beriledi", - dedi mınıstrliktiń mal sharýashylyǵy ónimderin óndirý jáne qaıta óńdeý departametiniń dırektory Erkebulan Axmetov QazAqparat tilshisine bergen suxbatynda. Budan bólek, kóktemgi egistik jumystaryna beriletin nesıeniń paıyzdyq mólsherlemesi 7,4-ten 3-ke deıin tómendetiledi degen jospar bar.

Aıta keteıik, búgin Úkimet músheleri agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasyn maquldady. "Jaqynda "Agrobıznes - 2020" baǵdarlamasyna ózgeris engizilip, 2013-2017 jyldarǵa deıin qysqartyldy. Sonyń ornyna mınıstrlik jańa memlekettik baǵdarlamany ázirledi. Atalǵan baǵdarlama keıingi 2017-2021 jyldardy qamtıdy. Búgin Úkimet saǵatynda ol baǵdarlama tanystyrylyp, qabyldandy", - deıdi E.Axmetov.

Mınıstrliktiń baspasóz qyzmeti xabarlaýynsha, búgin Úkimet jańa baǵdarlama boıynsha arnaıy qaýlyny qabyldap, ary qaraı Prezıdent Ákimshiligine jiberdi.