Kooperatıvke birikken ońtústikqazaqstandyq sharýalar tabystaryn eselep jatyr
ShYMKENT. QazAqparat - Ońtústik Qazaqstan oblysynda kooperatıvke birikken sharýalar tabystaryn eselep jatyr. Búginde «Ońtústik» aımaqtyq ınvestıtsııa ortalyǵy 10 kooperatıvti qarjylandyrýda, dep habarlaıdy QazAqparat HAA tilshisi.
Sharýalar úshin kooperatıvke birigýdiń tıimdiligi orasan ekenin aıtqan ortalyq mamandary Arys qalasynda boldy. Turǵyndardy tyń bastama boıynsha memleket usynyp otyrǵan múmkindikterden habardar etti. Máselen, kásibin sýbsıdııalap, nesıeleýde turǵyndarǵa jeńildikter jeterlik.
Sala mamandarynyń sózinshe, «Ońtústik» aımaqtyq ınvestıtsııa ortalyǵy jyl basynan beri 16 kooperatıvti qurýǵa kúsh salǵan. Bul maqsatqa 279 mln teńge qarjy qarastyrylǵan. Sondaı-aq ortalyq kásip ashamyn degenderge mol múmkindik usynyp otyr. Búginde kooperatıvterdiń kepildemesiz, jeńildetilgen nesıeler alýyna jaǵdaı jasalǵan. Qarjylandyrý mekemesiniń kómegimen qazirgi tańda 10 kooperatıvke 290 mln tenge bólingen. Al Shymkent qalasynda birikken 4 sharýa qojalyqqa qoldaý kórsetý maqsatynda 61 mln teńge qaralyp otyr. Budan bólek, 2 sút tasymaldaý avtokóligi alynyp, 2 sút qabyldaý beketi men 3 óńdeý tsehy jáne mal soıý beketi jabdyqtalǵan.
