Qonys-kolonııadaǵylarǵa shet elderge shyǵýǵa tyıym salynady - ІІM
ASTANA. QazAqparat - Qonys-kolonııadaǵylarǵa shet elderge shyǵýǵa tyıym salynady. Búgin Májiliste Qylmystyq-atqarý júıesindegi máselelerge arnalǵan Úkimet saǵatynda QR Іshki ister mınıstri Qalmuhanbet Qasymov osylaı málimdedi.
Toqtala ketetin jaıt, Úkimet saǵaty barysynda depýtat Raýan Shaekın mınıstrden qonys-kolonııa túrindegi mekemelerdiń qanshalyqty qajettiligin suraǵan bolatyn. Onyń aıtýynsha, elimizde 18 qonys-kolonııasy bolsa, onda negizinen abaısyzda qylmys jasap, isti bolǵan shamamen 3 myńǵa tarta sottalǵandar bar. «Mundaı mekemeniń tıimdiligi qandaı? Óıtkeni, halyq arasynda bul naǵyz jemqorlyq shemasyna aınalǵan mekeme dep aıtylyp júr. BAQ-ta da sondaı mekemelerde ustalǵandardyń birazy shet elderde ýaqytyn ótkizgendigi, úı sharýasymen, óziniń jeke máselelerimen shet elderge shyǵyp turatyny jazylyp ta júrdi. Bálkim qylmystyq izgilendirý degen osy shyǵar?» - dep surady Raýan Shaekın.
Óz kezeginde mınıstr Qalmuhanbet Qasymov qonys-kolonııalardaǵylardyń shet elge shyǵýlary boıynsha derekter bar ekenin moıyndap, jańa zańnamada ondaıǵa tyıym salynatynyn atap ótti. «Sottalǵan tulǵa jeke kýáligimen Qyrǵyzstanǵa 20-30 ret bara alatyn, sondyqtan da kóptegen máselelerdi retteýimiz kerek. Al qonys-kolonııalarǵa kelsek, bul Qylmystyq jáne Qylmystyq-atqarý kodeksin ázirleý barysynda talqylanǵan, ásirese osy mekemeni ońtaılandyrý týraly áńgime kóp boldy. Buǵan deıin bul qonys-kolonııalarynyń jaǵdaıy jaqsy edi, óıtkeni olar kásiporyndarmen kelisimshart jasasyp, barlyq sottalýshylar jumyspen sol jerde qamtylyp turdy. Al qazir osynda sottalǵandar negizinen jumysty ózderi izdep tabady, al biz olardyń izin ańdyp, baqylaýdy ǵana júzege asyrýdamyz», - dedi Іshki ister mınıstri.
